Aalisarnermut isumaqatigiissut nutarterneqartussanngorpoq

EU-mut aalisarneq pillugu isumaqatigiissutaa Nunatta katillugit ukiumut 320 million koruuninik isertitsissutigisartagaa isumaqatigiinniutigineqartussanngorpoq. Isumaqatigiinniarnerit Ilulissani ingerlanneqassapput.

Aalisarnermik isumaqatigiissummut tapiliussamik taaneqartartoq aappaagu ukiup naanerani atorunnaassaaq, taartissaalu atorfilittanit Namminersornerullutik Oqartussaneersunit kiisalu EU-p aallartitaanit ullumimit sapaat ilanngullugu isumaqatigiinniutigineqartussanngorpoq.

Isumaqatigiissut marlunngorlugu 2003-mi avinneqarsimavoq, aalisarnermut oqartussaanermut kiisalu nunatta ineriartortinneqarneranut pisariaqartitsinermut akiliuteqartarnermut tunngasunut avinneqarsimalluni.

Aalisarnermut oqartussaanermut tunngasoq 240 million koruuninik naleqarpoq, ineriartortitsinermullu taasanut 80 million koruuniullutik. Aningaasat ineriartortitsinermut atugassat pillugit EU ilaatigut piumasaqarsimavoq, aalisarnermik politikkimik erseqqissumik ilusilersuisoqassasoq.

Aningaasalli taama agguataarneqarsimanerat EU-p ilaasortaasa ilaannit soorlu Europaparlamentimeersunit ukiuni kingullerni sakkortuumik aamma isornartorsiorneqartarsimavoq, aalisagartassat ilaasa tamakkerneqanngitsoortarnerat tunngavilersuutiginiarneqartarluni, taamaattumillu EU-p pissarsiarisartagai aningaasartuutinut naleqqunnersut apeqquserneqartalersimapput.

Aammali nunat qulit EU-mut ilaasortanngoqqammerput, taakkulu tapiissutinik pissarsinissamut periarfissaqarluarsimanatik, nunatsinnut isumaqatigiissummut apeqquseeqataasalernerannik malitseqartumik.

Maanna isumaqatigiinniarnissani aallartittussani suleqatigiinnissamik taallugu isumaqatigiissuteqartoqarnissaa anguniarneqartussanngorpoq, piujuartitsilluni ineriartornermik tunngaveqartumik.

Taamatut EU-mut isumaqatiginninniarnissamut inatsisiliornermi pioreersut suliassaqarfinnilu pissutsit atoruminartut ullutsinnut naleqqussarniarneqarput.

Aalisarneq pillugu isumaqatigiinniarneq atorfilittatigoortumik ingerlanneqassaaq, Namminersornerullutik Oqartussat sinnerlugit Aalisarnermut Pisortaqarfimmi allaffiup pisortaa Emanuel Rosing peqataassalluni.