Aalisarnermut Isumalioqatigissitaliap suliassani suli aallartissimanngilaa
- Raajarniarneq pillugu nalunaarusiaq naammassineqaqqammerpoq, taannalu akuerineqassappat inatsisitigut allannguisoqartussaassaaq. Raajarniarneq pillugu apriilip naalernerani isumasioqatigiittoqartussaavoq, taamaammat tamanna pissutigalugu aalisarnermut inatsimmik suliaq ilaatigut kinguartinneqarpoq, Aalisarnermut Piniarnermullu Naalakkersuisoq Finn Karlsen oqarpoq, nangillunilu:
- Nunap sunaluunniit pingaarnersatut inuutissarsiuutaata inatsisissaa pillugu oqallittoqaleraangat ilaatigut aalassassimaartoqartarpoq, suliarlu ilaatigut sivisoorujussuarmik ingerlasarluni. Aalisarnermut inatsisissaq upernaaq manna naammassissagaluarutsigu rekordileeqqajarpugut, assersuussutigiinnarlugu oqaatigisinnaavara Savalimmiuni ukiorpassuarni oqallittoqareermat inatsit naammassineqarpoq, Finn Karlsen oqarpoq.
Aalisarnermut inatsisissap kinguartinneqarnera, Inatsisartut Aalisarnermut ataatsimiititaliaanni ilaasortat Inuit Ataqatigiinneersut Demokraatineersullu akueriuminaatsippaat.
Aalisarnermut Isumalioqatigiissitaliami siulittaasussaq tassaavoq professori Christen Sørensen, ulluinnarni Odensep Universitetiani atorfeqartoq, Nunatsinnilu aningaasarsiorneq pillugu statsministerimut siunnersuisartunut siulittaasuusoq.
