Aalisarnermut inatsit pingaarnerpaajutippaat
Raajarniarneq pillugu nalunaarusiaq maanna naammassineqartoq aallaavigalugu nunami tunitsiviit aalisarnermut naleqqussarlugit aaqqissuusseqqittoqassasoq, Peter Olsen oqarpoq, nangillunilu oqarluni, Kalaallit Nunaat tamakkerlugu tamakkiisumik aalisartagartassiissutit KNAPK-p Aalisarnermut Siunnersuisoqatigiinni siuttuunermini annertuumik sunniuteqarfigisimagaa.
Peter Olsen aamma oqarpoq silap pissusaata allanngoriartornerata angisuumik sunniinera pissutaalluni Kalaallit Nunaanni piniartut ilaasa isertitakilliulernerat ikioqatigiilluni aaqqiiviginiartariaqartoq.
- Angallatitaarniarnermi maleruagassat sakkortuumik sukateriffigineqarnerisa kingorna angallatinik piorsaanissaagaluaq akimmisaartinneqarpoq kinguneranillu inuusuttut aalisarnermut soqutiginnikkaluartut aportinneqarlutik, Peter Olsen oqarpoq. Piniakkat, timmissat, qilalukkat arferillu killilersukkat pillugit Peter Olsen oqarpoq piniarnermik inuutissarsiuteqartunut naleqqussaasoqartariaqalersoq.
Imaani ajunaarsimasut ataqqinartumik eqqaallugit, KNAPK-p siulittaasuata ilaqutaasut qanigisaasullu tamaasa ukiumi nutaami pilluaqquai iluanaarluarnissaannillu kissaallugit.
