Aalisarnermut inatsisissaq sakkortuumik isornartorsiorneqarpoq

Aalisarnermut inatsisissamut siunnersuut nutaaq tusarniutigineqaqqammersoq, attuumassuteqartunit amerlasuunit sakkortuumik isornartorsiorneqarpoq.

Kalaallit Nunaanni kommunit kattuffiata, kommunit arfiniliinnaat akisimammata uggoraa, pissutaatippaalu tusarniaanerup aasaanerani ingerlanneqarsimanera. Upernaviup Kommunia isumaqarpoq, kommunerisami aalisartut inatsisissami illersorneqanngippallaartut. Uummannap kommuneata maluginiarpaa piniartut aalisartullu qimussimik ukiukkut qaleralinniartartut, inatsisissatut siunnersuummi eqqaaneqanngimmata aamma aalisarsinnaanermut akuersissutissat akeqalernissaat uparuarneqarpoq.

Ilulissat kommuneata pisortat aalisariutinik piginneqataasinnaatitaalernissaat akerlerilluinnarpaa, Royal Greenlandip qaleralinnianut namminersortunut unammillernera iluarineqanngereermat. Qaleralinniarnissamut akuersissutinik qinnuteqartoqassaarnissaata peqassutsimut sunniuteqarnerlussinnaanera Ilulissat Kommuneanit aamma ernummatigineqarpoq.

Ilulissat kommunea isumaqarpoq nuna allamiut apereeqqaaratik aalisariartalernissaat taamaalippat qalliallassasoq. Politimestereqarfiup ippigaa Landsretti tusarniarneqarsimanngimmat, inatsisissatut siunnersuummi inatsisaareersut arlallit kalluarneqarmata. Sualummik unioqqutitsisut akiligassinneqarnertik eqqartuussivimmut anngussinnaalertussaammassuk Landsretti tusarniartariaqartoq Politimesteri isumaqarpoq. Politimesterip aamma ippigaa, unioqqutitsisoqartillugu aalisariutip naalagaa unnerluutissaarlugu piginnittup unnerluunneqarsinnaanngornissaa. Politimesteri isumaqarpoq umiarsuup nalaaganik akisussaatitsisarneq qimanneqarpat pisarissersorpallaartoqalissasoq.

Pinngortitaleriffiup ippigaa pisassiinermi amerlassuseeriaatsit, tunisanillu nalunaaruteqartussaatitaanerit inatsimmi mininneqarsimammata. Namminersornerullutik Oqartussani Inuussutissarsiornermut Pisortaqarfiup ippigaa aalisarnermi killissarititaasunik assigiinngitsunik nalilersuinerni aningaasarsiornermik ilisimasallit allallu immikkut ilisimasallit akuutittarnissaat mattunneqarmat.

Inuussutissarsiornermut Pisortaqarfik isumaqarpoq aningaasarsiornikkut inuit naliginnaat inuiaqatigiillu soqutigisaat angisuut aalisarnermiitillugit eqqortuussasoq nalilersueqqissaarnermi ilisimatuut amerlnaerit peqataasarpata.