Aalisarnermut inatsisissaq oqallisigissavaat

Aalisarnermut inatsisitaarnissaq 2003-mili siunnersuutigineqarpoq, inatsisissatullu siullermeerluni oqaluuserineqarluni 2007-imi. Tamatuma kingorna kinguarsarneqaqattaarpoq politikerit kattuffiillu isumaqatigiissutigisinnaanngimmassuk.

Aalisarnermut Naalakkersuisup, Ane Hansenip allannguutissatut siunnersuutai marluk pingaaruteqarput. Siullermik, aalisarsinnaanermut akuersissutit taamaallaat inunnut ataasiakkaanut ukiuni siuliini marlunni aalisarnermit isertitat minnerpaamik 50 procentiussasut siunnersuutigaa. Aappassaanik, sinerissap qanittuani pisassiissutit qaffasinnerpaaffissaasa 10 procentimiit 15 procentimut qaffanneqassasut, Ane Hansenip siunnersuuutigaa.

Aalisarnermut Naalakkersuisup siunnersuutai kattuffinnit arlalinnit isumaqatigineqanngillat. KNAPK ima oqarpoq:

- Raajarniat ernumassutigaat Royal Greenland aamma Polar Seafood angisoorsuarnik kilisaateqarnermikkut suli annerulerumaartut, tamannalu uagut ilaasortatsinnut akisussaqaaq, KNAPK-p siulittaasua Leif Fontaine Sermitsiamut oqarpoq.

- Ilaasortavut tamatumunnga peqataarusunngilaat, Leif Fontaine nangilluni oqarpoq.

Kalaallit Nunaanni Sulisitsisut Peqatigiiffiata Sermitsiamut oqaatigaat, 15 procentimut qaffaaneq suli appasippallaartoq. Taamaakkaluartorli taakku isumaqarput taama siunnersuuteqarneq pitsaasumik alloriarnerusoq.

Ane Hansenip oqaatigaa taama siunnersuuteqarnini unammilleqatigiinnermut aammalu sinerissap qanittuani aalisartumut iluaqutaajumaartoq.