Aalisarnermut inatsisissaq nutaaq nakeriallaatigineqarpoq
Aalisarnermut inatsisissaq tusarniarneqartussanngorlugu nassiunneqarpoq - aalisarnermillu inuussutissarsiutilinnik sullissisunit arlalinnit taanna pakatsissutigineqarpoq.
Aalisarneq pillugu isumalioqatigiissitap siunnersuutaasa ilaat misissorneqaratillu malinneqanngimmata inuussutissarsiutilinniit assorsuaq pakatsissutigineqarpoq, Polar Seafoodimi siulersuisuni siulittaasoq, Svend-Erik Danielsen, oqarpoq.
Aviisimi Sermitsiami allaaserineqartut naapertorlugit inuup ataatsip imaluunniit kilisaataatileqatigiiffiup pisassiissutit ilaannik qanoq annertutigisumik piginnittuunissaa pillugu maleruagassat inatsisissatut siunnersuummi sakkortusineqarsimapput. Toqqaannartumik piginnittuunermut maleruagassat siornatigut atuupput - maleruagassalli toqqaannanngitsumik piginnittuunermut maanna atuuttussaapput.
Maleruagassat sakkortusineqarnerisa kingorna kilisaataatillit pisassiissutinik amerlavallaanik pigisaqartut pigisatik ukiut arfineq-pingasut ingerlanerini tunisimassavaat. Tamanna Royal Greenlandimut Polar Seafoodimullu naleqquppoq.
Svend-Erik Danielsen ima oqarpoq:
- Kilisaataatillit mikisut angisuullu amerlaqaat, taakkulu aningaaserivinni taarsigassarsiniarsinnaanngingajapput, kisianni suliffeqarfissuarnit taakkunannga marlunnit taarsigassarsiniarsinnaasimapput. Aamma ilimagineqarsinnaavoq suliffeqarfissuit taakku aqqutigalugit naammattunik tunisaqarsinnaasut, aamma piginneqataagunik, kisianni aningaasat qanoq amerlatigisut pisariaqarnersut
ataasiaannarlungaluunniit takusimanngisaannarpara, Svend-Erik Danielsen oqarpoq.
Royal Greenland maanna oqaaseqarumanngikkallarpoq.
Svend-Erik Danielsenilli nuannaarutigaa, sinerissamut qanittumi aalisarnermi pisassiissutit procentinit quliniit 15-inut siunnersuummi qaffanneqarmata. Avataasiorluni aalisarnermi pisassiissutit 33,3 procentiuinnarput.
Tusarniaassut Kalaallit Nunaanni Aalisartut Piniartullu Kattuffiata, KNAPK-p, aalisartunut immikkoortortaminullu 70-inut nassiuppaa. taakkulu akissuteqartinnagit KNAPK-mi siulittaasoq, Leif Fontainé oqaaseqarumanngikkallarpoq.
Sulisitsisut Peqatigiiffianni pisortaq, Henrik Leth, aviisimut Sermitsiamut oqarpoq, siunnersuut massakkut isikkoqarluni akuersissutigineqassagaluarpat, tamanna "aalisarnermut ajunaarnersuartut" nalilerneqassasoq.
Tusarniaaneq aggustip ulluisa 20-annut killeqarpoq.
