Aalisarnermut inatsisissaq kinguartinneqarpoq
”Isumaliutigilluareerlugu aalajangerpunga aalisarneq pillugu inatsisip allannguutissaatut siunnersuut juulimi 2009-mi tusarniutigineqartoq Inatsisartut 2009-mi ukiaanerani ataatsimiinneranni saqqummiunniarnagu”, Ane Hansen oqarpoq. Tassunga taarsiullugu Kalaallit Nunaanni aalisarnerup sutigut tamatigut imminut nappassinnaanissaanik Naalakkersuisut anguniagaqarnerat naapertorlugu Ane Hansen saqqummiussaqarniarpoq.
Pisanik nunamut tulaassanik nakkutilliinissamut Naalakkersuisut periarfissaqalissapput Ane Hansen allappoq.
Nakkutilliineq ullutsinnut naleqqutiinnanngilaq pisariaqarlunili. Namminersorlutik Oqartussat periarfissaqalissapput Kalaallit Nunaata Aningaasaqarnikkut Oqartussaaffigisaani IUU-mik aalisarnermik unioqqutitsilluni, killilersugaanngitsumik nalunaarutigineqarnerlu ajortumik aalisarnermik nakkutilliinissamik.
Taamatut nakkutilliinissamut Kalaallit Nunaat pisussaaffeqarpoq, aningaasatigut soqutigisani tunngavigalugit kisiannili aamma nunat tamat akornanni isumaqatigiissutinut Kalaallit Nunaata atsiugaanut tunngatillugu, Ane Hansen oqarpoq.
Allannguutitut siunnersuutit ilagaat tunitsiviit elektroniskikkut pisanik nalunaaruteqartussaatitaanerannik Namminersorlutik Oqartussat peqqusisinnaalernissaat. Tamassuma Namminersorlutik Oqartussat iluaqutigisussaavaat pisanik nalunaarutinik sukkasuumik pitsaasumillu allaffissornermi suliarinnissinnaalissammata Ane Hansen oqarpoq.
Aalisarneq pillugu inatsimmi aalajangersakkanik allanik nutarterineq pilersaarutigineqartutut ingerlaqqissaaq, ilaatigut Aalisarneq pillugu Ataatsimiititaliarsuup siunnersuutigisaatut suleqatigiissitanik arlalinnik pilersitsinikkut, Kingusinnerusukkut Ane Hansenip nalilersussavaa siunnersuummik nutaamik saqqummiinissap qaqugu pinissaa pitsaanerpaajunersoq, tassa suleqatigiissitaliat assigiinngitsut angusaat utaqqineqassammata, Ane Hansen naggasiivoq.
