Aalisarnermut inatsisissap allanngortinnginnissaa pakatsissutigaat

Aalisarnermut inatsit massakkut isikkumisut Inatsisartunut saqqummiunneqassasoq, Naalakkersuisut siulittaasuata Hans Enoksenip inatsisartut ukiaanerani ataatsimiinnerat ammarlugu ippassaq oqaaseqarnermini erseqqissaatigaa.

Tamanna Sulisitsisut Peqatigiiffianit pakatsissutigineqaqaaq.

Aalisarneq pillugu ataqatigiissaarisutut atorfilik Jens K. Lyberth ima oqarpoq:

-Naalakkersuisut siulittaasuata ammaanersiornermi oqalugiaataa soqutigalugu tusarnaarnikuuarput, tassani sammineqartut soqutiginartut assigiinngitsut, soorlu namminersornerunissamtut, kommunit aqqissuuteqqinnissaannut, inuussutissarsiornermik ineriartortitsinermut tunngasut malinnaaffigilluassagavut aamma soorunami immersueqataasinnaagaangatta taamaaliortassaagut, Jens K. Lyberth aallartippoq.

Kisianneqartippaalli.

-Pakatsissutigilaarparput aalisarnermut inatsimmut missingersuut taamatut isikkoqarluni saqqummiunniarneqarmat, tassanimi oqaluuserisassat soqutiginartut amerlasoorujussuupput.

Pissanganartunullu ilaasoraa massakkut naalakkersuisoqatigiit Atassut Siumullu namminneq maajimi 2006-imi piumasaqaatitik timitalissaneraat.

-Naalakkersuisut naliliinerunik eqqaamasariaqarpaat paasissutissat assigiinngitsorpassuit misissoqqissaarnissaat, misissorneqareerpatalu inatsisiliorneq aallartissinnaassasoq, oqarpoq.

Aamma ataatsimiititaliamik pilersitsinissaq taamanikkut neriorsuutigineqartoq oqaatigaa.

- Ajoraluartumik taamatut inatsisartut piumasaqaataa timitalerneqarsinnaatsitutut uagut isigaarput, taamaattumik neriuutigisorugussuuarput aalisarnermut isumalioqatigiit innersuussutaat inatsisartut malissagaat, tassa inatsisiliorneq kinguartillugu.

Kinguartitsinikkut paasissutissat tunngavilersuutissallu assigiinngitsut suliarineqareerpata aatsaat qallisinneqassasoq, Jens K. Lyberth isumaqarpoq.

Jens K. Lyberth Sulisitsisut Peqatigiiffianni sulianut aalisarnermut tunngasunut akisussaasuuvoq.