Aalisarnermut atortunik nutaaliaanerusunik perusupput
Aalisarneq pillugu Aalborgimi nittarsaassinersuaq aalisarnermut tunngasunik nioqqutissiortut atortunik pitsanngorsaanissaannik nutaanillu sanaartornissaannik oqaloqatiginninnermik nunatsinni sinerissamut qanittumi aalisartut atorpaat.
Aalisariutaatillit KNAPK-mi siunnersortaat, Klaus Gedionsen, ilisimatitsivoq, nioqqutissiortut aalisarnermut atortunik pitsanngorsaanissaannik nutaanillu sanaartortoqarnissaanut tusarniaaneq Kalaallit Nunaanni aalisartut Aalborgimi nittarsaassinersuarmi atoraat.
Aalisariutaatillit KNAPK-mi siunnersortaata, Klaus Gedionsenip aamma ilisimatitsissutigaa, nunatsinni aalisartut nioqqutissiortullu akornanni nittarsaassinersuarmi attaveqaateqartoqangaatsialersoq.
- Ippassaq arlaleriarluta ataatsimeeqatigiippugut. Maalaarutit nioqqutissiortunut ilaatigut ingerlateqqippavut, taava aamma aalisartut namminneq atortunut nutaanut siunnersuutaat kissaataalluunniit ingerlateqqillutigik, Klaus Gedionsen oqarpoq.
Aalisarnermut tunngasunik Aalborgimi nittarsaassinersuarmi aalisarnermi atortut nutaaliat suulluunniit nittarsaanneqarput, umiatsiaaqqaniit atallaarsuarnut, umiarsuup naalagaasa angallatini issiaviiniit qassutinut allaat ilanngullugit. Aalisarnermi atortut nutaat tuniniaanissamik suliniutinut pilerisaarutigineqassapput, aalisartutullu inuutissarsiuteqarneq pillugu arlaleriarluni ataatsimeersuartoqassaaq.
Nittarsaassinersuarmi ullormi siullermi inuit 2.400-it takusaapput, ukiut marluk matuma siorna 3.500-imallutik.
Aaqqissuusinermi pisortap, Ernst Trillingsgaardip, ilimaginngilaa soqutiginnittut matumuuna amerlarujussuarnissaat:
Takutitsisunut 400-iuusunut inuit 15.000-it takkunnissaat naatsorsuutigaarput. Tamatumunnga pissutaavoq Danmarkimi aalisarneq kinguariartormat, taamaammallu aalisartut nittarsaassinermut ima ittumut soqutiginnippallaarunnaarsimallutik, Ernst Trillingsgaard Radioaviisimut oqarpoq.