Aalisarnermut ataatsimiittaliaq: Aalisagartassanik agguaasseriaaseq allanngortinneqartariaqarpoq
Taassuma siunersuutigaa, aalisagartassanik siunissami agguaassisartussat tassaassasut aalisarnermut attuumassuteqanngitsut.
- Ataatsimiititaliamit eqqarsarpugut aalisagartassanik agguaasseriaaseq allatut ingerlanneqartalertariaqartoq tassa aalisarnermut attuumassuteqanngitsunit agguaassisoqartalerluni aamma aalisarnermut attuumassuteqartut kattufiit agguaassisartut ataatsimiititaliaanni aallartitatut peqataasalernissaat siunnersuutigalutigu. Taamaalilluni agguaassisarneq tamanut naapertuunnerulersussaasoq isumaqaratta. Aamma allannguinermi inuiaqatigiinnut aningaasat amerlanerusut tuttalernissaat naatsorsuutigatsigu taama siunnersuuteqarpugut, Nikolaj Jeremiassen oqarpoq.
Aakisarnermut ataatsimiititaliap siunnersuutaa piviusuungortinneqassappat, taava ingerlatsinermut inatsit allanngortinneqartariaqartoq, Aalisarnermut, Piniarnermut Nunalerinermullu Naalakkersuisoq, Karl-Kristian Kruse oqarpoq.
- Aalisarnermut attuumassuteqanngitsut agguaassisalernissaannik siunnersuut piviusunngortinneqassappat, taava ingerlatsinermut inatsit aatsaat allanngortinneqaqqaartariaqarpoq. Taamaattorli qanoq iliornikkut agguaasseriaatsit periussissallu nalilersugassat oqaloqatigiinnikkut aaqqeriarneqarnissaat naatsorsuutigaara, Karl-Kristian Kruse oqarpoq.
Ukioq manna avaleraasartuunik pisassanik agguaassinerit qanoq ingerlanneqarsimanersut, Inatsisartut aalisarneq pillugu ataatsimiititaliaannit misissorneqaleruttorput. Ataatsimiititaliamilu ilaasortat ataasinngorpat naapeqqikkunit, Naalakkersunit paasissutissanik annertunerusunik ujartuinissartik pilersaarutigaat.
Taamaakkaluartorli avaleraasartuunik agguaasseriaatsip allanngortinneqarluni pitsaanerulernissaa, Nikolaj Jeremiassenip isummerfigereerpaa.
- Maanna periusaasoq atorneqaannassappat inuiaqatigiit aalassassimaarnerat ingerlaannartussaavoq. Taamaammat allannguisoqartariaqarpoq.
Inatsisartut aalisarnermut ataatsimiititaliaata siulittaasua, Nikolaj Jeremiassen aviisimut Sermitsiamut ullumi saqqummersumut aamma oqarpoq, avaleraasartuunik ukioq manna pisassiinerit allanngortinneqassanngitsut, tassami taamaaliortoqassappat pisassinneqareersimasunut aningaasanik taarsiinissat pinngitsoortinneqarsinnaassanngimmata.
