- Partii Siumut ilumini ajornartorsiormat suliat tamarmik ingerlanneqanngillat, uninngapput, Aqqaluaq B. Egede oqarpoq.Assi: KNR/Anton Gundersen Lihn

Aalisarnermut ataatsimiitsitaliami ilaasortat: Siumumi eqqissiviilliorneq peqqutigalugu suliat uninngapput

Aalisarnermut ataatsimiititaliaq unittooqqasoq, Aqqaluaq B. Egede oqarpoq. Tamannali siulittaasumit Demokraatinillu ilisarineqanngilaq.

Aalisarneq nunatsinni inuussutissarsiutit pingaarnersaraat. Aalisarnerli pillugu inatsisissamut tunngatillugu suliassat uninngatinneqarput. Aalisarnermut, Piniarnermut Nunalerinermullu Ataatsimiititaliami siulittaasup tullia Aqqaluaq B. Egede (IA) taama oqarpoq.

Taannalu naapertorlugu unittooqqaneq peqquteqarpoq:

- Partii Siumut ilumini ajornartorsiormat suliat tamarmik ingerlanneqanngillat, uninngapput, Aqqaluaq B. Egede oqarpoq.

AAMMA ATUARUK Siumut siulittaasuata tullia: Henrik Fleischerip kukkussutini nassuerutigaa

Inatsisartuni aalisarnermut ataatsimiitsitaliap siulittaasuata Henrik Fleischerip aalisarnermut naalakkersuisumut tatiginnikkunnaarnermi kingorna partiimi ilaasortaajunnaariarluni ilaasortanngoqqinnera Inatsisartuni suliassanut pingaarutilinnut assigiinngitsunut unittooqqatitsisoq illuatungiliuttut oqaatigaat.

Enoksen isumaqataavoq

Aalisarnermut ataatsimiititaliami ilaasortap Hans Enoksenip Aqqaluaq B. Egede isumaqatigaa:

- Isumasioqateqarnissarput aamma kinguartinneqarpoq. Tassa politikkimi ajornartorsiorneq pissutigalugu. Tassanilu suliassaapput aalisarnermut piniarnermut taavalu aamma immikkut saaffiginnissutit nunap sinneraniik, soorlu umimmanniarnerit tuttunniarnerit aammalu immikkut ikiorsiisarnermut tunngasut. suliassat tamakkua kinguartiterneqarput, Hans Enoksen (PN) oqarpoq. Taanna naapertorlugu Naalakkersuisunik isumasioqateqarnissaraluaq ilaatigut kinguartinneqarsimavoq.

- Naamik uanga ilisarisinnaanngilara, Steen Lynge oqarpoq nangillunilu. Assi: KNR

Ilisarisinnaanngilara

Aqqaluaq B. Egedep Hans Enoksenillu isornartorsiuinerat Demokraatit isumaqatiginngilaat.

- Naamik uanga ilisarisinnaanngilara, Steen Lynge oqarpoq nangillunilu:

- Ataatsimiititaliaminngaanniit Naalakkersuisumik naapitaqarnissaq pilersaarutaasimasoq sapaatip akunnerata tulliani taanna kinguartinneqarnikuuvoq. Suna pissutaanersimanersoq akissuteqarfigisinnaanngilara.

AAMMA ATUARUK Naalakkersuisoq: Taama oqitsigisumik tatiginninnginnermik oqariartortoqarnera akuerinngilara

Suliat ilai sapaatip akunneranik kinguaraluartut, aalisarnermut ataatsimiititaliaq pilersaarutaasumik ullumi tallimanngornermi ataatsimiittussaasoq, Steen Lyngep oqaatigaa. Ataatsimiinnissarlu februaarip 20-anili aalajangerneqarpoq:

- Eqqissiviilliortoqarsimappat eqqissiviilliortoqarsimanngippalluunniit tamanna ataatsimiititaliap ataatsimiinnissaanut kinguarsaataanavianngilaq, Steen Lynge oqarpoq.

Naalakkersuisooqataasut, Nunatta Qitornai tapersersortaasullu Demokraatit Siumumut piumasaqartariaqalersut Aqqaluaq B. Egede isumaqarpoq.

Aalisarnermut ataatsimiititalimi siulittaasup Henrik Fleischerip suliat kinguartinneqartariaqarsimanerinut ilisarinnissinnaanani KNR-imut oqaatigaa. Naalakkersuisumik isumasioqateqarnissaq sapaatip akunneranik kinguartinneqartoq, aalisarnermut ataatsimiititaliami ilaasortat amerlanerussuteqarlutik taasissutigigaat, Henrik Fleischerip ilanngullugu oqaatigaa.

Aalisarnermut ataatsimiititaliarsuaq isumaliutissiissummik kingusinnerpaamik 2020-mi juunip naalernerani tunniussissaaq. Naalakkersuisullu kingusinnerpaamik upernaakkut ataatsimiinnermi inatsisissatut siunnersuutivimmik aalajangersimasumik saqqummiussinissaat siunertaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat