- Siunnersuinermi innersuussutigineqartunit amerlanerusunik aalisartoqannginnissaa innersuussutigaarput, ataatsimiititaliarsuarmi siulittaasoq oqarpoq.Assi: KNR/Anton Gundersen Lihn

Aalisarnermut ataatsimiititaliarsuaq: Aalisagakinnerulinngikkuni pisassakinnerulissapput

Aalisarnermut ataatsimiititaliarsuup innersuussutai malinneqassagunik umiatsiaararsortut allanik suliffissaqarnissamut periarfissaannik ukkatarinninnissaq pisariaqassaaq.

Nunatsinni umiatsiaararsortut ukiuni kingullerni amerliartuinnavipput. Umiatsiaararsortut taakku qaleralinniaanngikkunik saarullinniaapput.

Umiatsiaararsortulli aalisakkanut killilimmik amerlassuseqartunut aamma ikinnerulerlutillu annikinnerulertunut amerlavallaarput. Tamanna Grønlandsbanekn maannamut aamma Aalisarnermut ataatsimiititaliarsuup oqaatigaa.

AAMMA ATUARUK Grønlandsbanken: Aalisartut inuunerissaarnissaminnut isertitaqarniarlutik ilungersortut amerligaluttuinnarput

Tamatuma saniatigut umiatsiaararsortut amerlinerat ilutigalugu Pinngortitaleriffiup piffissami 2013-imit 2020-mut pisassiissutit ikinnerusut innersuussutigai.

Pinngortitaleriffiullu pisassiissutikinnerulernissaanik innersuussuteqarnera aalisakkat ikinnerulerlutillu mikinerulerneranut takussutissiivoq – tamannalu aalisartunut tamanut pissutsinik ajornerulersitsisoqarnermik kingunersinnaasoq, ataatsimiititaliarsuaq allappoq.

Uumassusilerisut siunnersuinerisa malinneqarnissaat innersuussutigigaa

Aalisarnermut ataatsimiititaliarsuup aalisarnermut inatsisissamut nutaamut atatillugu innersuussutit inaarsarnialerpai. Tamatumunnga atatillugu aalisarneq pillugu oqaaseqaasiorsimapput.

Ataatsimiititaliarsuup allaatiginninnerminik juunip naanerani naammassinissani naatsorsuutigaa, tamatumalu kingorna innersuussutitik Naalakkersuisunut saqqummiutissavaat.

Aalisarnermut ataatsimiititaliarsuup siulittaasuata, Jens Paulsenip ataatsimiititaliarsuup uumassusilerisut siunnersuinerata malinneqarnissaat innersuussutigissagaat oqaatigereerpaa.

- Siunnersuinermi innersuussutigineqartunit amerlanerusunik aalisartoqannginnissaa innersuussutigaarput, siulittaasoq oqarpoq.

Naalakkersuisut qaleralinnut saarullinnullu atatillugu uumassusilerisut siunnersuinerannit qaffasinnerungaatsiartumik ukiuni kingullerni amerlasuuni pisassiissuteqartarput. Naalakkersuisullu tamatuma saniatigut pisassiissutit tamakkerneqareeraangata ingerlaavartumik qaffaaqqittarlutik.

Assersuussutigalugu uumassusilerisut Qeqertarsuup Tunuani sinerissap qanittuani qaleralinniarnermut 4.346 tonsit innersuussutigaat, Naalakkersuisullu 7.847 tonsinik pisassiissuteqarlutik.

AAMMA ATUARUK Ataatsimiititaliarsuaq qaleralinniarneq pillugu: Killiffik attanneqarsinnaanngilaq

Saarullinniarnermut atatillugu 10.566 tonsit siunnersuutigineqarput, Naalakkersuisullu 21.000 tonsinik pisassiissuteqarlutik.

Taamaammat Naalakkersuisut nutaat innersuussutinik malinnissappata umiatsiaararsortut qaleralinnik saarullinnillu pisassiissutikinnerulernissaa naatsorsuutigisinnaavaat.

Pisassiissutilli ukiut arlallit ingerlanerini annikinneruleriartussasut, Jens Paulsen nassuiaavoq.

- Tassanngaannarpallaannginnissaa aalisartunullu sakkortuallaannginnissaa taamaalillutillu aaqqissuussinissamut ukiualunnik periarfissaqarnissaat pissutigalugu ukiut ingerlanerani appariartortinneqarnissaat innersuussutigissavarput.

- Ilaannik aalisartoqarunnaanngikkuni tamarmik annikinnerusumik aalisalissapput, Aalisarnermut ataatsimiititaliarsuup siulittaasua oqarpoq.

Umiatsiaararsornermit aatsitassarsiornermut

Umiatsiaararsortuujunnaartoqassaguni suliffissanik allanik periarfissaqarnissaa, ataatsimiititaliarsuup innersuussutigaa.

Ataatsimiititaliarsuup tunutaasutut isumaliutissiissummini aatsitassarsiorneq aamma sanaartorneq erseqqissaatigai.

Susassaqarfiit taakku marluk qanoq ineriartornerat apeqqutaagallarpoq, ataatsimiititaliarsuulli sulisussanik piumasoqangaatsialernissaa naatsorsuutigalugu sulisussallu ullumikkut amigaataareersut allappaa.

- Qulaani takusat pisariaqalersitsipput ataqatigiissaartumik siunissamullu isigisumit susassaqarfiit akimorlugit pilersaarusiorluartoqarnissamik, tulluussarnerup allannguutai suliffissaaleqisitsinermik kinguneqassanngillat, kisiannili:

- Atorluarneqartariaqarpoq suliffiusinnaasuni allani periarfissatsialattut, kalaallinillu sapinngisamik sulisoqalernissamut, aamma Sulisussaaleqinerup pakkersimaarneqarnissaanut aqqutissaavoq, aalisakkerinerup iluani piginnaasareriikkat atorluarnerisigut, soorlu angallatini anginerni aammalu aalisakkanik tunisassiornerup ilaani, ataatsimiititaliarsuaq allappoq.

Isumaliutissiissut Aalisarnermut ataatsimiititaliarsuarmiit saqqummiunneqartoq, aalisarnermik inuussutissarsiornermut innersuussuteqanngilaq.  Isumaliutissiissut ilungersuutigineqartunut nassuiaasersuutaanaavoq, ataatsimiititaliani ilaasortat innersuusinissaminnut ilisimasassanik tunngavissatut atorsinnaaniassammassuk.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat