Aalisarnermut ataatsimiititaliarsuup isumaliutersuut ukiut marluk suliarereerlugu sapaatip akunnerata siuliani saqqummiuppaat.Assi: Malik Brøns, KNR.

Aalisarnermut ataatsimiititaliaq: Akitsuutit isertitaqaalluartarput

Aalisarneq pillugu ataatsimiititaliarsuaq qaleralinnut akitsuummut massakkut oqaluuserineqartumut isummerusunngilaq. Aalisarnermili sinneqartoorutinut akitsuutit ataatsimut isigalugit nunatta karsianut aalisarnerullu ineriartorluarnissaanut iluaqutaasut siulitaasup tullia oqarpoq.

Qaleralinnut akitsuusersuineq Aalisarneq pillugu Ataatsimiititaliarsuarmit qanoq oqaaseqarfigieqassanersoq pissanngatigineqarsimavoq.

Naleqqakkut Inuit Ataqatigiillu ilaasa peerusuppaat, aningaasaqarnermulli naalakkersuisoq, Asii Chemnitz Narup, isumaliutersuutip qanoq imaqarneranik utaqqeqqaarusussimavoq.

AAMMA ATUARUK Naleraq aningaasanut inatsisissatut siunnersuummut akerliliivoq: Qaleralinnut akitsuut peerneqassaaq

Isumaliutersuutimi akitsuusersuisoqassanersoq akitsuusersuisoqassanngitsorluunniit ersarissumik allaqqasoqanngilaq, taamaattorli Aalisarneq pillugu Ataatsimiititaliarsuup tusagassiortunik ataatsimiisitsineranni siulittaasup tulliata inuussutissallu aningaasarsiutiginerannik ilisimasallip, Peder Andersenip, aalisakkanut akitsuutit iluaqutissartaqarnerarpai.

Aalisarnermut ataatsimiititaliap siulittaasuata tullersortaa, Peder Andersen.

- Aningaasarsianut akitsuutinit nioqqutissanullu akitsuutinit equngatitsinnginnerummat, akitsuut taanna pitsaasorujussuuvoq. Nunamut pigisanulluunniit Kalaallit Nunaanni akileraarusiisoqarnavianngimmat, immamit amusanit isumalluutinut imaluunniit piiaaffinnut akileraarusiineq qinigassani allani pitsaanerpaavoq, taanna oqarpoq.

Akitsuuteqarunnaarsitsisoqarpat amerlanerusut aalisalissasut

Apeqqummut tunngasumik politikkerit tunngavigisinnaasaannik ersarissumik naliliisoqarsinnaanngitsoq, Peder Andersen oqaatigaa. Pingaarnersiuinermi tassani apeqqutaavoq.

- Akitsuutinut tunngatillugu, taava isummat sinneqartoorutip qanoq naapertuuttumik agguarneqarnissaa piilugu apeqqutaapput. Taannalu isumalioqatigiissitamit arlaannit erseqqissummik inerniliiffigineqarsinnaanngilaq, Peder Andersen oqarpoq, nangillunilu.

- Aalisarnerulli uumassusilerinermut tunngasortaa nakkutigitinnagu akitsuut peerneqarpat, aalisarsinnaatitaanermik kissaateqartut amerlissapput, Peder Andersen oqarpoq.

AAMMA ATUARUK Aalisarnermut ataatsimiititaliarsuaq: Politikerit pisassiissuteqartarunnaassapput

Tamannalu isumalioqatigiissitap pingaarnertut inerniliussaanut akerliulluinnarpoq. Kinguaariimmi tullii aalisagaqarsinnaaniassammata, isumalioqatigiissitap sinerissap qanittuani aalisagartassiissutit ikilisariaqarnissaat, sinerissallu qanittuani aalisarnermik suliaqartut ikilisariaqarnissaat inerniliuppaa.

Aalisarnermi akitsuutiniit isertitat pisariaqavissumik ineriartornissamut ikiuutaasinnaassasutut isumalioqatigiissitamiit ilimagineqartut, Peder Andersen oqarpoq. Tassa aalisartut ikinnerusut aalisariutillu ullutsinnut tulluarnerusut.

Akitsuuteqaraluartoq sinneqartooruterpassuit

Tamanna oqariartuut Aalisarneq pillugu ataatsimiititaliarsuup siulittaasuata, Jens Paulsenip itisilerpaa.

- Aalisarnermi sinneqartooruteqarluarfiunissamut tunngaveqarnissaq sinneqartoorutillu taassuma inuiaqatigiinnut naapertuuttumik agguarneqarnissaa tunngavigaarput, taanna oqarpoq. Aalisarnermit sinneqartoorutit ilaat tamat atugarissaarnerannut atorneqarsinnaaniassagamik nunatta karsianukartariaqartartut isumalioqatigiissitamit isumaqaput.

AAMMA ATUARUK KNAPK qaleralinnut akitsuut pillugu: Qinersisartunik aalisarneruvoq

Aalisarnermi sinneqartoorutit ukiuni kingullerni "amerlasimasut" Jens Paulsen oqarpoq.

- Aamma avataasiortut ingammik qaleralinnut akitsuutitigut pisortanut akiliingaatsiartaraluartut, taanna oqarpoq.

Naalakkersuisut suli aalajanginngillat

Qaleralinnut akitsuutip politikkikkut aalajangiiffigineqarnissaa arlaqartunit utaqqineqarpoq.

Naleraq akitsuutip peerneqarnissaanik Inuit Ataqatigiinut annertuumik piumaqasaqarpoq. Akitsuummi peerneqanngippat Naleqqameersup Jens Nappaattuup aningaasanut inatsisissatut siunnersuut itigartinniarlugu sioorasaarutigaa.

AAMMA ATUARUK Ataatsimiititaliarsuaq qaleralinniarneq pillugu: Killiffik attanneqarsinnaanngilaq

Aningaasaqarnermut naalakkersuisup Asii Chemnitz Narupip suli aalajangernani allakkatigut akissuteqarluni paasissutissiisutigaa.

- Isumaliutissiissut oqaluuserineqaqqaassaaq, ataqatigiittumillu aaqqiisoqassalluni. Taamaammat aningaasaqarnermut nunamullu namminermut naalakkersuisup aatsaat kingusinnerusukkut nalunaaruteqarnissani kissaatigaa, Narupip naalakkersuisoqarfia KNR-imut allappoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat