Aalisarnermut aningaasaliisarnini unitsissavaa

Nunatsinni aningaasarsiornerup tunngavippiaa, aalisarneq, inatsisitigut nutarterneqartussaavoq. Inatsisissarli ataatsimiititaliamit misissoqqissaarneqartussaq suli misissorneqalinngilaq.
Allattoq Jokum Nielsen
decembarip 12-at 2007 10:19

Aalisarnermut inatsisissap siunnersuutigineqartutut akuerineqassappat Danmarks Skibskreditfond kilisaatinik aningaasaleeqataasarnerminik unitsitsiniarpoq. Kilisaatit angisuut nunatsinni umiarsuaatileqatigiiffinnit pigineqartut aqqaneq marluupput.

Kilisaatit nutaat 150 mio koruunit missaanik naleqartartut, pisiarineqarnerminni 90 procent tikillugu Danmarks Skibskredit Fondimit aningaasalersorneqakkajupput. Taarsigassarsiallu ukiut qulit 15-nillu ingerlaneranni akilersorneqaqqakujullutik.

Tassa kilisaat 150 mio. koruuninik nalilik Danmarks Skibskredit Fondimit 135 mio. koruuninik aningaasalersorneqarsinnaavoq.

Danmarks Skibskredit Fond kilisaataatileqatigiit oqaaseqaataanni ilaatigut allappoq inatsit siunnersuutigineqartutut piviusunngorpat, Kalaallit Nunaanni aalisarnermut aningaasaliisarnini unitsissallugu. Inatsimmi siunnersuutigineqartumi oqaatigineqarpoq inatsisartut ukiunik tallimanik ilimasaaritsitereerluni pisassiissutigineqartut piffissamik killilersorneqanngisut piffissamik killilersulersinnaassallugit.

Upernaru inatsisissap saqqummiunnissaa sioqqullugu ataatsimiititaliaq inatsimmik misissueqqissaartussaq suli aallartissimanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq