Aalisarnermut akuersissutit ilaneqaqqissanngillat
Qaleralinniarnermut atatilugu aalisarnissamut akuersissutinik nutaanik tunniussisoqaqqissanngikkallartoq Naalakkersuisuisunit aalajangiunneqarpoq. Aalisartullu amerlassususaat aalisagaqassutsimut naleqqussarneqassaaq.
200 tonsit Diskobugt-imi aalisartunit decembarip qaammataanut immikkoortinneqarsimasut eqqaassanngikkaanni Nunatta avannaani qaleralittassiissutit aalisartunit aalisarneqarsimalerput. Aammalumi ukiuni arlaqalersuni immikkut ittumik pisassinneqarnissaq piumasarineqartarsimagaluarpoq. Maannakkulli qaleraleqassutsimut sanilliullugu aalisartut amerlavallaarnerat Naalakkersuisunit naqissuserneqarpoq.
- Taamaattumik qaleralinniarsinnaanermut akuersissutinik nutaanik tunniussisoqassanngitsoq aalajangiupparput. Aamma aalisartoq utoqqalinini pillugu aalisarunnnaarpat imaluunnit allamik suliffissarsippat, kinguaavinut akuersissummik tunniussisoqassangitsoq, Ane Hansen KNR-mut oqarpoq.
- Maannakkut aaqqissuussineq qaleraleqassutsimut naleqquttumik aalisartut amerlassusseqalernissaasa tungaanut atuutissaaq. Kisiannili imaaliinnarlunga siunissami aalisartut qanoq amerlatigissanersut oqaatigisinnaanngilara, Ane Hansen oqarpoq.
Aalisapiluttoqarnera aalisartut namminneerlutik nassuerutigereernikuuaat. Tamanna pivoq 2006-mi aggustip qaammataani aalisartut taamanikkut Ilulissat kommuiniata aaqqissugaanik ataatsimiisinneqarmata. Taamanikkut Ilulissani aalisartut uparuarpaat kommune-nit allaniit Ilulissat eqqaannut aalisariartartut pissutigalugit imartami annertunngitsumi aalisartut amerlavallaalersut.
- Aap aalisapiluttoqarpoq, naak kinguaassatta aalisagassaat, Aalisartut ilaatigut taamani aperipput. (imaqarniliaq aasinnaavat ataani linki atorlugu).
Ataatsimiinnermi najuuttut ilagaat taamanikkut Naalakkersuisut siulittaasuat Hans Enoksen. Imaqarniliarlu taamanikkut aalisarnermut Naalakkersuisumut Finn Karlsen-imut nassiunneqarpoq.
Qaleralinnut aalisarnissamut akuersissutit unitsinneqarnissaannik aalajangerneq, qaleralinniarnermi ingerlatsinermi Naalakkersuisut pilersaarutissaanut ilagiinnarpoq. Ingerlatsinermi pilersaarut nungusaataanngitsumik aalisarnermut uppernarsaammik MSC-mut pissarsinissamut aqqutissaavoq aalisakkanillu pisiortortut piumasaraat pisiatik MSC-mik nalunaaqutserneqarsimassasut.
Qeqertarsuup tunuanut pisassiissutaasartut, ukiualuit qaangiuttut 12.800 tonsiniit ukioq manna 8.000 tonsinut ikilineqarput, ukiullu siuliinut naleqqiullugit pisassiissutit nungulertornerusalerput.
- Peqassutsip ajutoorluinnarnissaa pinngitsoorniarlugu pisassiissutit ikilisinnikuuvagut. Pissutissaqarluarpugullumi taama annertutigisumik pisassiissutinik ikilisaasimagatta, Ane Hansen oqarpoq.
