Aalisarnermik soqutigisaqaqatigiit naalakkersuisup tunuartup suleqatigisimanera oqaaseqarfigerusunngilaat

Aalisarnermi soqutigisaqaqatigiit Rasmus Frederiksen-ip Aalisarnermut Piniarnermullu Naalakkersuisutut tunuarnera annikitsuinnarmik oqaaseqarfigerusuppaat.

Naalakkersuisuni pisut kiisalu Rasmus Frederiksenip Aalisarnermut Piniarnermullu Naalaakkersuisutut tunuarnera Aalisariutinik Piginneqatigiiffiit Kattuffiata APK-p pisortaata Peder Munk Pedersen-ip oqaaseqarfigerusunngilaa.

KNAPK-mili siulittaasoq Peter Olsen naalakkersuisuujunnaartup suleqatigisimaneranut ima oqarpoq:

-KNAPK-minngaanniit Aalisarnermut Naalakkersuisuusimasoq qutsavigerujussuarparput, qujavugut suleqatigisimaneranut, Peter Olsen oqarpoq.

Suleqatigisimanera eqqarsaatigalugu qanimut suleqatigisimallugu Peter Olsen oqarpoq pitsaanerusinnaagaluartorli.

-Saaffiginnissutigut suliassallu allakkatigut nassiussimasagut eqqarsaatigalugit soorunami suleqatigiissimaneq pitsaanerusimasinnaassagaluartoq oqaatigerusuppara, Peter Olsen oqarpoq.

34-nik ukiulik Rasmus Frederiksen qaammatit qulingiluat sinnilaarlugit Naalakkersuisuuvoq.

Simon Olsen-ip Aalisarnermut Piniarnermullu Naalakkersuisutut suliassaminik naammaginartumik suliarinnissimannginnera peqqutigalugu tunuarmat, Rasmus Frederiksen-ip naalakkersuisutut paarlappaa, naalakkersuisunngoramilu qinikkatut ilisimaneqanngilaq.

Rasmus Frederiksen skibsmontør-itut ilinniagaqarpoq, naalakkersuisunngortitaagamilu Sisimiut Kommunianni aalisarnermut piniarnermullu siunnersuisutut atorfeqarluni.

Naalakkersuisuunermini sivikitsumi aalisarneq pillugu EU-mut isumaqatiginninniarnerni pingaarutilinni siuttuuvoq, tassani pingaarnertut saattuat 1000 tonsit nunatsinnut utertinneqarnissaat anguniarlugu. Nannunut tunngatillugu nalunaarusiaq suliarineqarpoq, taakkulu Nunavut suleqatigalugu naammassiniarneqarpoq, isumaqatiginninniarnerillu suli ingerlapput.

Korea kujallermi IWC-mi ataatsimeersuartoqarmat Rasmus Frederiksen-ip tikaagulliusaartassat affaannanngortinneqarnissaat akueraa, tamannalu KNAPK-mit naammagineqanngilaq, tikaagulliusaartassat nikitinneqannginnissaat kissaatigineqaraluarmat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat