Aalisarnermik politikkeqarneq nassuaatigineqassaaq
Inatsisartut ullumi ataatsimiinneranni aalisarneq milliarderpassuarnik naleqartoq oqaluuserineqassaaq.
Naalakkersuisut aalisarneq pillugu aaqqissuussaasumik politikkeeqarnissaat pillugu Inatsisartunut nassuiaat oqariartuuteqarpoq aalisarneq peqatigiilluni piujuartitsinissarlu tunngavigalugu siunissami ingerlanneqassasoq, tamannalu Inatsisartuni ullumi oqaluuserineqassaaq.
Nunarput aalisarfissuuvoq siornalu 2003-imi imartamit 2 millioni kvadratkilometerisut annertutigisumit aalisakkat 144,600 tonsit, 2,3 milliardi koruuninillu nalillit qallorneqarput.
Taamaattorli raajat nunarsuarmi akii aatsaat taama appasitsigipput, EU-milu allanngortiterinerit Imarpiup avannaani aalisarnermut sunniussimammata nunatsinni inuussutissarsiutit pingaarnersaata aalisarnerup ataqatigiissumik siunissami pilersaarutioneqarnissaa pisariaqartoq Naalakkersuisut isumaqarput.
Piujuartitsinissaq tunngavigalugu aalisarneq siunissami ingerlanneqassaaq. Aalisarnerup avatitsinniit alaatsinaanneqarneqarulernerata akisussaassuseqarnerusumik pisuussutinik atuinissarput pisariaqartikkaa, Naalakkersuisut allapput.
Tamatuma saniatigut suliffeqarfiit namminersortut aalisarnermi annertunerusumik periarfissaqalernissaat anguniakkanut ilaavoq.
Aalisarneq pilugu nassuiaammi Royal Greenlandip namminersortunngorsarneqarnissaa aamma isummerfigineqarpoq, tassani suliffeqarfissuup namminersortunngorsarneqarsinnaaneranut tunngasut iternga tikillugu misissoqqaarneqarnissaat Naalakkersuinit pingaartinneqartoq oqaatigineqarluni.
Taamaattumik suliffeqarfiup siulittaasui Naalakkersuisunit kaammattorneqarput namminersortunngorsaasinnaanissaq pillugu misissueqqaaqqullugit.
Illuatungaanili Naalakkersuisunit Royal Greenland aamma nalunaarfiginiarneqarpoq Naalaakkersuisut misissueqqaarnermik aallartitsiniartut, namminersortunngorssaanissallu qaqugu pinissaanut misissueqqaarnerit utaqqineqassasut Naalakkersuisut allapput.
Royal Greenlandip ilaannakortumik tamakkiisumilluunnit namminersortunngorsarneqarnissaanik misissueqqaarnerit pillugit Naalakkersuisut aappaagu 2005 naatinnagu Inatsisartunut saqqummiussissapput.
