Aalisarnermik piniarnermillu nakkutilliineq allanngortiteriffigineqartussanngortoq

Karl-Kristian Krusep aalisarnermi piniarnermilu nakkutilliineq eqaannerulersikkusuppaa.
Allattoq Karsten Sommer
januaarip 13-at 2015 06:52

- Nakkutilliineq nutaamik aaqqissuussivigissallugu pilersaarutigaarput. Sumiiffinni unioqqutitsinerpaaffiusutut isigineqarsinnaasuni taamaassorisaniluunniit annerusumik nakkutilliisalernissaq siunnerfigineqarluni.

Aalisarnermut, Piniarnermut Nunalerinermullu Naalakkersuisoq, Karl-Kristian Kruse, aalisarnermut nakkutilliisunut, piniarnermut nakkutilliisunut, alaatsinaattunut tulaassuinermilu nakkutilliisunut, Nuummi ukiumoortumik sisamanngornerup tungaanut ataatsimiinnermi ippassaq ataasinngornermi taama oqarpoq.

- Ilissi nakkutilliisarnissinni misilittakkasi tunngaviussapput, nalunaarusiarisartakkasi tunngaviussallutik, aalisartut pisaminnik nalunaarutigisartagaat aamma tunngaviussallutik. Paasissutissat uppernarsineqartarput aamma malittarisassat qanoq katitigaatiginerini ersertarluni, Karl-Kristian Kruse oqarpoq, erseqqissaallunilu nakkutilliinerup nutaamik aaqqissuunneqarnissaa pitsaasumik ilinniarsimasuunissamik piumasaqaatitaqartoq, misilittagaqarluarnissamillu piumasaqaammik aamma nassataqartitsissalluni.

Ineriartortoqartuarmat pikkorissaqqittuartarnissaq pingaaruteqarpoq, aalisarnerinnaq inatsisiliornerillu kisimik ineriartunngimmata.

Nakkutilliinerup nutaamik aaqqissuunneqarnissaa sungiunniagassanik aamma eqaannerusumik sulisalernissamut naleqqussarnissamik piumasaqaateqarpoq.

Karl-Kristian Kruse, ataatsimeeqataasunut 25-t missaanniittunut taama erseqqissaavoq.