Aalisarnermik naleqqussaanissaq pisariaqarpoq
Aalisarneq inuussutissarsiutini avammut tunisaqarnerpaaffiusarpoq, tassa avammut nioqqutitta 90 procentii, aalisarnermeersuusarput. Raajat nunarsuarmi akikilliartuinnarnerat nunatta isertittaanut sunniuteqarpoq, taamaattumillu aalisarnermi suliffiit suli taammarartuarallarnissaat naatsorsuutigineqartariaqarpoq. Taama ilaatigut
Naalakkersuisut 2007-mi Aningaasaqarnikkut Ingerlatsineq pillugu Nalunaarutaat oqariartuuteqarpoq.
Aningaasarsiornikkut imminut napatikkiartuaarneq allanngoqqunagu aalisarnermi naammassisaqarsinnaasuseq unammillersinnaassuserlu pitsanngorsarneqartuartariaqarput tunisassianik pitsanngorsaaneq aqqutigalugu. Taamaammat naatsorsuutigisariaqarpoq, siunissami aalisarnermi aalisakkanillu suliareqqiinermi suliffiit suli tammarartuarallassasut, inuussutissarsiutinilu allani sulisussat pisariaqartinneqaqisut pissarsiarineqarsinnaalissasut inuiaqatigiit aningaasaqarnerannut nukittorsaataasinnaasumik. Tamanna Naalakkersuisut 2007-mi Aningaasaqarnikkut Ingerlatsineq pillugu Nalunaarutaanni ilaatigut atuarneqarsinnaavoq.
Sinerissamut qanittumi aalisarnermik ingerlatsisuararpassuit pissutigalugit aningaasartuutit qaffaseqaat naammassisaqarsinnaassuserlu annikeqaluni, unammillersinnaassuseq killeqarpoq aalisartut ataasiakkaat aningaasaqarniarnerannut ajorsiartuinnartitsisumik. Taamaammat aalisartitseqatigiit annerusut imminnut akilersinnaasut ikaarsaarfigisariaqalerput.
Ukioq 2004-mi aalisartut 2.000-it missaanniipput, 3.500-llu missaat suliareqqiinermik suliaqartuullutik, tassa nunatsinni sulisut 15 procentiisa missaat aalisakkerinermik suliaqartuupput, 5.500 missarpiaaniillutik.
Nunatsinnilu aningaasarsiorneq pillugu Siunnersuisoqatigiit naliliineranni inerniliunneqarpoq sineriassortunut avataasiortunullu raajartassiissutit tamarmiusut, kilisaatinit angisuunit 14-init tamakkerneqarsinnaasut, tamatumuunakkullu raajarniarnermi tunisassiornermilu suliffiit 700-t tikillugit tammassasut.
Takornariartitsinermi sanaartornermi pisortallu sullissiviini sulisussaaleqisoqarpoq aatsitassarsiornermilu sulisunik atorfissaqartitsinerup annertusiartornissaa naatsorsuutigineqarluni. Taamaattumik inuit inuussutissarsiutinut allanut ilinniarfissaqartinneqarnissaat pingaaruteqartoq, nalunaarummi allaqqavoq. Naalakkersuisut 2007-mi Aningaasaqarnikkut Ingerlatsineq pillugu Nalunaarusiaat Inatsisartut upernaakkut ataatsimiinneranni sammineqassaaq.
