Ilaatigut qaleralinnut akitsuutit nunatta karsianut aningaasanik isaatitsipput.Assi: Forsvaret

Aalisarnermik ingerlataqartut kattuffiat: Kinamut nioqquteqarneq piffissami matumani aarlerinarluinnarpoq

Aalisarnermik ingerlataqartut kattufiini naalagaaffeqatigiinni aannerpaami pisortap oqarnera naapertorlugu aalisakkanik Kinamut nassiussineq nalorninarluinnarpoq. Avammut tunisineq 2,5 milliardit koruuninik nalorninartorsiorfiuvoq.

Nunat kiilliit Kinallu akornanni covid-19 pillugu isummat assigiinngitsut aporaanneri kalaallit aalisakkanik suliffeqarfissuinut kinguneqartupilussuupput.

Poul Meldgaard taama oqarpoq. Taanna naalagaaffeqatigiinni aalisarnermik ingerlataqartut kattuffiini annerpaami, Danish Seafood Associationimi pisortaavoq.

Suliaq naatsumik

Kina kalaallit qaleraliutaannik raajaanillu qalerualinnik piortornerpaasarpoq.

 

Kinamili aalisakkanik nioqqutissat coronamik akoqarsinnaaneri ernumassutigineqarpoq, taamaammat malittarisassat sukaterneqarput.

 

Tamanna pissutigalugu qaleralinnik raajanillu qalerualinnik millioninik nalilinnik nunatsinni, Danmarkimi Europamilu qerititsivissuarni uninngaannartoqarpoq.

 

Kinami oqartussat covid-19 inuussutissaq aqqutigalugu tunillaassuunnissaa ernumassutigaat, taamaammat inuussutissat tamarmik Kinamut eqqunneqartut misissorneqartarput.

 

Tamatuma saniatigut Kinap avataanit inuussutissanik nioqquteqartunut piumasaqaatit sukateriffigai.

Assersuutigalugu aalisartuni kia aalisakkat sorliit pisarisimanerai nunatta nalunaarsortariaqarpaa.

 

Taamaaliortoqarsinnaangitsorlu, Bruno Olsenip Royal Greenlandimi tunisassiornermut pisortap paasissutissiissutigaa.

 

- Tunngaviusumik isummat asiigiinngitsut aporaanneri tunngaviupput. Uagummi covid-19 inuussutissatigut tuniluuttutut isiginngilarput – nunani killerni tamani taama isumaqartoqarpoq. Kinamiulli allatut isumaqarput, taanna oqarpoq.

Piumasaqaatinik malinninnissaq suliassarujussuusoq

Taamaammat Kina inuussutissanik nunamut eqqussorneqartunut qaammatini kingullerni sukaterisorujussuuvoq. Kingullermik malittarisassat sukannersut atuutilernerannit piffissap sivikitsup iluani nalunaarutigineqartut ukiup nikinnerani atuutilerput.

Suliffeqarfiit aalisakkat tunisatik suminngaanneernersut Kinamullu qanoq assartorneqarnersut maanna paasissutissiissutigisassavaat, covid-19-ilu pillugu iliuusereqquneqartut naammassissallugit. Inuit akuusut tamarmik aamma Kinami nalunaarsorsimassapput.

- Tamannalu suliassarujussuuvoq, Poul Meldgaard oqarpoq.

Tamatuma saniatigut malittarisassanut nutaanut annertuunullu naleqqussarniartuaannarnissaq suliffeqarfinnut uippakajaarnarlunilu akisuvoq.

- Naalli nioqqutissat EU-mit nassiunneqannginneranni misissuisaraluarluta Kinami coronavirusimik takussutissamik nassaannginnissaat qulakkeersinnaanngilarput – taava nioqqutissat suneqassappat? Utertinneqassappat, aserorterneqassappat imaluunniit allatut iliuuseqarfigineqassappat? Apeqqutit ammasut amerlasoorujussuupput, taamaammat nioqquteqarneq piffissami matumani aarlerinarluinnarpoq, pisortaq oqarpoq.

Avammut nioqqutit milliardinik nalillit ajutooratarsinnaasut

Aamma nioqqutissat allaffissornerujussuarmit unittoortinneqaratarsinnaapput. Kinamimi oqartussat nunarsuarmi tamarmit inuussutissalerinermik suliffeqarfiit inunnik suliffeqarfinnillu tamanik nalunaarsuillutillu immersugassanik immersuisaleriasaarnissaannut malinnissinnaanissaat qularnarpoq.

Danish Seafood Association naapertorlugu Danmark nunarpullu aalisakkanik 2,5 milliardit koruuninik nalilinnik Kinamut ukiumut tunisaqartarpoq.

- Avammut nioqquteqarnermut tamarmut piumasaqaatit matumani ajutooratarsinnaapput, Poul Meldgaard oqarpoq.

Piumasaqaatilli qasukkarneqarnissaat suliffeqarfiillu piumasaqaatinut nutaanut malinnaasinnaanissaannut aqqutissiuinissaq danskit oqartussaasuisa sulissutigaat.

Tamanna inuussutissaqarnermut aqutsisoqarfik danskillu Beijingimi aallartitaqarfiat aqqutigalugit sulissutigineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat