Aalisarnermi akitsuutit nutaat aappaagumiit
Siunnersuutit pisuussutit ernialerneqavinnissaannut aallarniutitut, aalisarneq pillugu inatsisissamut nutaamut sivisuumik utaqqineqarsimasumut ilaasutut isigineqarsinnaapput. Immikkoortut 148-t Inatsisartut ukiakkut ataatsimiinnissaanni tallimanngorpat tulliani aallartittussami eqqartorneqartussat taanna ilagaat.
Inatsisissatut siunnersuutip aappaa saqqummiuteqqitaavoq. Raajat akitsuutaannik, nunatta karsianut isaatitserpiarsimanngisaannartumik qaffaanissamik imaqartoq. Maannali akitsuusiisarneq sukateriffigineqalerpoq. Avataani aalisarnermit raajat tunineqarnerminni kilomut akiat 12 koruuniugaangat akitsuut maannakkut akilerneqartalissaaq, maanna tunisinermi kilomut akiusumut 13 koruuniusumut taarsiullugu. Tamatuma nunatta karsianut aningaasat isertinneqartartut 9 mio. koruuninik qaffaateqartissavai.
Inatsisissatut siunnersuutip aappaa nutaarluinnaavoq. Tassani Aningaasaqarnemut Naalakkersuisup Palle Christiansenip aalisakkat qaleruallillu aallerfigineqarsinnaanerat ammaassiffigaa. Tassami nunatsinni saarulliit qalerallillu nunami suliassanngorlugit tulaanneqarneq ajortut - aallaqqaataaniugallartoq - akitsuuserneqartarnissaat angujumavaa. Nunatsinni suliffissuit avaqqullugit saarulliit tunineqarneranni kilomut 1 koruuni aammalu qalerallit tunineqarneranni kilomut 2 koruuni nunatta karsianut tuttarnissaa angujumavaa. Taamaaliornikkut 22 mio. koruunit isertinneqartalernissaat Palle Christiansenip naatsorsuutigaa.
Oqaatigineqareersutuulli imaanit pissarsiarineqarsinnaasut suugaluilluunniit akitsuusernissaat saqqummiuppaa. Tassami saarullernat, nataarnat, uiluiit, saattussat, periarfissiisoqarpoq, saarulliit ilaat kullerit, ammassat, saarulliit arlaat mørksejit ammassassuillu akitsuuserneqarsinnaanerat inatsissatut siunnersuummi periarfissiissutigineqarpoq.
Umiarsuarnik aalisariutaatillit ukiuni kingullerni naatsorsuutaannik misissuataarinerup kingorna akitsuutissat nutaat pillugit siunnersuut suliarineqarsimavoq. Matuma malitsigisaanik akitsuutit nutaat raajanulluunniit akitsuutip qaffanneqarnissaa eqqarsaatigalugu taakku nammalluarsinnaagaat nalilerneqarsimalluni.
Taamaakkaluartoq Palle Christiansenip suliassaqarfimmut iliuuseqarnera taanna kingulliussagunanngilaq. Inatsisissatut siunnersuummut ilanngussatut oqaaseqaatini allassimasutuut, inatsisissat suliarineqarneranni misissueqqissaarnerit sukumiisut ingerlannissaannut periarfissaqartoqarsimanngilaq. Aalisakkalli akitsuuserneqarnissaat pillugu siunnersuutit nutaat pisariitsumik suliarineqarsimapput taamaalillunilu aalisakkanut akitsuut anuarip aallaqqaataaniit atuuttunngorsinnaanera piviusorsiortuuvoq.
Akitsuutit nutaat aningaasanut inatsimmut ilanngunneqartarnissaat siunertarineqarpoq.
