Aalisarneq unioqqutitsineraanerlu
Unioqqutitsilluni aalisarneq isertortumik nalunaarusiarineqareersorlu Aalisariutinik Piginneqatigiiffiit Kattuffiata, APK-ip, suliaq misissoqqissimavaa.
Unioqqutitsisoqarsimannginneranik kilisaatit pingasut uppernarsaateqarlutik maanna nalunaaruteqarput.
- Nalunaarusiami isertuunneqarsimasumi unioqqutitsilluni kilisaatit taakku aalisarsimasutut nalunaarusiarineqarsimapput, APK-ip pisortaa Peder Munk Pedersen oqarpoq:
- Nalunaarusiami takusinnaavavut angallatit sorliit qanoq amerlatigisunik pisaqarsimanersut. Kilisaatit pingasut politimestereqarfimmut saaffiginnissimapput uppernarsaatillu assigiinngitsut allaganngorlugit takutillugit, Peder Munk Pedersen oqarpoq.
Politimesteri politiinut nalunaaruteqarpoq kilisaatileqatigiiffinnit pingasuusunit allakkanik tigusaqartoqarsimasoq. Taakku allattaavinnik uppernarsaasersorlutik unioqqutitsissimannginnertik uppernarsarniarlugu saaffiginnissimapput.
- Paasissutissat misissuinermi eqqortuunersut misissorneqassapput, soorlu aamma Jørgen Wæver Johansenip Gorm Kjeldsenillu akissutigisimasaat tigusimasagut taama misissorneqarumaartut, Anders Linnet oqarpoq ilisimatitsissutigalugulu, angutit pineqartut politiinit qanittumi apersorneqarumaartut.
