Aalisarneq pillugu Qaqortumi innuttaasunik unnugu ataatsimiititsilersut

Kujataani aalisarnerup siunissaa pillugu Qaqortumi innuttaasunik unnugu ataatsimiititsisoqassaaq.
aggustip 25-at 2016 04:25
Nutserisoq Simon Uldum -

Aalisakkerivinni sulisussanik pissarsiniartarnerup ajornartorsiutaanerata aaqqiissuteqarfiginissaanut innuttaasut isumasiorneqarnissaat tamatumani tunuliaqutaavoq.

Ataatsimiititsinissamik aaqqissuisoq tassaavoq suliffeqarfik Arctic Prime Fisheries, taassumalu aalajaatsunik sulisussaaleqinerup annertuumik ajornartorsiutaanera isertuutinngilaa.

- Sulisut naatsorsuutigineqarsinnaatinnagit ineriartortitsisoqarsinnaanngilaq, Ole Aggo Markussen, Arctic Prime Fiskeriesimeersoq tusagasassiorfinnut nalunaarummi taama oqarpoq.

Suliffeqarfiup sulisussanik avataaneersunik tikisitsisinnaanermut periarfissaq eqqartorsimagitsik taassuma oqaatigaa, Ole Aggo Markussenili aamma ima oqarpoq:

-  Taamak iliornissaq akisuujuvoq, aamma allatigut periarfissarsiorluni aaqqiissuteqarsinnaaneq ujartoqqaarneqartariaqarpoq, sapinngisamik najugarisami sulisussat aallaavigalugit.

Suliffeqarfik Siumumeersunit borgmester Jørgen Wæver Johansenimit aamma ataatsimiititaliami siulittaasumit Simon Simonsenimit ilalerneqarpoq.

Taakkumi innuttaasunik ataatsimiititsinermi, Katersortarfimmi unnugu nalunaaqutaq arfineq-marlunut pisussami, aamma saqqummiissapput.

Nanortalimmi aggustip 27-ani nalunaaqutaq 15.00 assingusumik aamma innuttaasunik ataatsimiititsisoqassaaq.