Aalisarneq pillugu politiit misissueqataalerput
Nalunaarusiami isertuunneqartumi unioqqutitsilluni aalisartoqarsimaneranik allanneqarsimasut pillugit Nuummi politiit misissuinermini politimesterimit ikiortiserineqarput.
- Taamaaliorsimavugut immikkut ilisimasalinnik pisariaqartitsisoqassasoralugu eqqortumillu suliaq aallaqqaataaniit ingerlanneqarniassammat ikioqqusimavugut, taama politimester Anders Linnet oqarpoq.
Politiit sapaatip akunnerani kingullermi ikiortiserineqarput taakkulu suliassaraat politimestereqarfik ikiortigalugu suliamik misissuinissaq.
Nalunaarusiap allap, aalisapilussimanermik allannertallip, misissuinermi ilanngunneqarnissaa Anders Linnet-ip ilimagaa.
- Nalunaarusiaq takunikuunngilara tusarnikuunagulu, taamaakkaluartorli misissussallugu pissusissamisuussaaq, Anders Linnet sulinerminut atatillugu angalasoq taama oqarpoq.
