Aalisarneq pillugu paasissutissat nittartakkami nutaami
Nittartagaq Fiskerforum.dk januaarip qaammataannaani 95.000-init iserfigineqarsimavoq.
Fiskerforum.dk Jyllandip avannaani Hvide Sandemi nittartagalerisartut Apolloweb-ip aallartippaa, aallartitsisoralugit Henning Yde aamma Ebbe Hansen.
- Nittartakkatsinnut isertartut kikkuuneri misissorlugit malugaarput nunanit allaneersorpassuusut, taamaammat Fiskerforum Danmarkimuinnaanngitsoq sammitilissavarput, Skandinaviamit tamarmit atorneqarsinnaanngorlugu, Ebbe Hansen nassuiaavoq, aviisi Berlingske nittartakkamini allaaserinnippoq.
Nunat avannarliit tamarmik Kalaallit Nunaallu ilaatinneqassapput. Isumassarsiamut Aalisarnermut kattuffik FiskeriLAG soqutiginningaarami nittartakkap piorsaqqinnissaanut 200.000 koruuninik tapiiniarpoq.
- Taakku aningaasartuutissatut missingersuutitta 40 procenterai, sinneri nassaariniassaqqaarpagut, Ebbe Hansen oqarpoq.
Fiskerforum.dk nutarsarlugu aallartinneqareerpoq, naatsorsuutigineqarporlu ukiup matuma ingerlanerani nittartagaq paasissutissanik nunanut avannarlernut aamma Kalaallit Nunaannut tunngasunik immerlugu naammassineqarumaartoq, Ebbe Hansen nassuiaavoq.
Fiskerforum.dk-mi assersuutigalugu inuussutissarsiutigalugu aalisarnermut tunngasut, inatsisit, silassaq, aalisariutinik atortuinillu pisiniarneq tuniniaanerlu nutaarsiassallu atuarneqarsinnaapput.
