Aalisarneq pillugu nutaamik nalunaarusiaq
Raajartanut ooqanngitsunut sikulersukkanut 2004-mi tapiissuteqartoqarpoq. Tapiissuteqarneq Royal Greenlandimit allaffissornikkut aqunneqarpoq. Tapiissutit raajartallu tulaanneqartut annertussusaasa qanoq imminnut naapertuutsiginerat Namminersornerullutik Oqartussanit misissorneqarpoq paasineqarporlu tapiissutit atorneqarnerat tulaassallu annertussusaat naapertuutinngitsut. Tamanna pillugu Nalunaarusiortoqarpoq saqqummiunneqaqqammersumik. Taama Nalunaarusiornermut tunngavik piniarnermut aalisarnermullu pisortaqarfiup pisortaata Amalie Jessen-ip ima nassuaerpaa:
- Tunngaviorpiarpoq 2004-mi inatsisartut akuersissutigimmassuk raajanik tunisinermi sinerissamut qanittumut tapiissummik tunniussisoqarnissaa.
- Aningaasat tapiissutit qanoq atorneqarsimanerat kiisalu raajanut tunisanut sanilliullutik qanoq annertutigisimaneri, 2005 aallartilaartoq misissorneqalerput. Misissuinermi malugaarput pineqartut kisitsisitigut assigiinngissuteqartut. Tamanna pillugu tapiissutinik aqqutsisimasumut tassa Royal Greenlandimut paasiniaavugut.
Amalie Jessen erseqqissaavoq ukioq mannmut tapissuteqartoqarsimanngitsoq, taamaattorli paasisat siunissami pisoqariataassagaluarpat naleqqersuutitut atorneqarsinnaasut, soorlu aalisarnermut malittarisassanik sukatereqqittoqassappat nalunaarusiaq tunngavissiueqataasinnaasoq.
Kinguneqartitsisoqassanersoq aperigatsinni Amalie Jessen akivoq massakkut nalilersuinerit ingerlasut naammassippata qanoq pisoqarnissaa takuneqarsinnaalissasoq.
- Kisianni malittarisassat allaffissornikkullu aqutseriaatsit nalimmassartissinnaavagut.
Aningaasanik aamma utertitsiniartoqarsinnaasoq Amalie Jessen oqarpoq:
- Tassa aningaasanik tapiissutinik atuisimanermi aningaasanik utertitsisinnaaneq aamma pisinnaavoq.
Matumani aningaasat 100.000 kronet 110.000 kronellu akornanni pineqartut Amalie Jessen erseqqissaavoq.
Aalisarnermut piniarnermullu pisortaqarfiup ”Kalaallit Nunaanni raajarniarnermi pisassiissutinit ilanngaassinerit nalunaarsorneqanngitsut aningaasatigut nalilerneqarnerat”- pillugu nalunaarusiaani ilaatigut tikkuarneqarpoq pisassiissutinit ilanngaassinerit nalunaarsorneqanngitsut atorunnaarsinnerisigut raajarniarmi pisat annertussusaat 8500 tonsit missaannik appariassasut. Tassanilu avataasiorluni aalisarneq ikilileriinermik annertunermik misigisaqassalluni. Nalunaarusiaq Royal Greenlandimit suli oqaaseqarfigineqarsimanngilaq.