Aalisarneq pillugu isumaqatigiissutissaq naammassineqartoq

Aalisarnermut, Piniarnermut Nunalerinermullu Pisortaqarfiup decembarip sisamaanni Kalaallit Nunaata Norgellu akornanni 2008-mi aalisarneq pillugu isumaqatigiissutissaq naammassivaa.
Allattoq Mads Lynge
decembarip 06-at 2007 07:54

Aalisarnermut, Piniarnermut Nunalerinermullu Pisortaqarfiup decembarip sisamaanni Kalaallit Nunaata Norgellu akornanni 2008-mi aalisarneq pillugu isumaqatigiissutissaq naammassivaa, Aalisarnermut Pisortaqarfik tusagassiutinut taama nalunaaruteqarpoq.

2008-mi aalisagartassat pillugit isumaqatigiinniarnerit atorfilittanit Oslomi Norgemi ingerlanneqarput. Isumaqatigiissut 2008-mi kalaallit Norgep imartaani aammalu Norgemiut Nunatta imartaani aalisarnissaannut toqqammaviussaaq.

Kalaallit Nunaata Barentip Imartaani saarullittassai kiisalu saarulliusaat kullerit amerlerialaarput, kisianni saarulliit ilaat sej-it pisassat ikilerialaassallutik.

Norgep saarullittassai kiisalu suluppaagartassai amerleriarput, naataarnartassaali ikileriangaatsiassallutik. Aalisarnermik soqutigisaqartut sinniisaat aamma Naalakkersuisoqarfik isumaqarput 2008-mut isumaqatigiissutikkut akuerineqarsinnaasumik angusaqartoqartoq.

Norgemut isumaqatigiinniarnikkut angusat kingusinnerusukkut akuerineqartussanngorlugit naalakkersuisunit saqqummiunneqassapput.

Kalaallit Nunaat sinnerlugu isumaqatigiinniartitat ulluni tulliuttuni Nunatta Savalimmiullu akornanni 2008-mi isumaqatigiissutissaq isumaqatigiinniutigissavaat. Isumaqatigiinniarnerit taakku Københavnimi ingerlanneqassapput.