Aalisarneq pillugu isumaqatigiinniarnerit naammassipput

Aalisarneq pillugu Kalaallit Nunaat EU-lu nutaamik isumaqatigiissuteqarput. Isumaqatigiinniarnerit ullaassaq sisamanut naammassipput, Kalaallit Nunaatalu koruunit 318 millionit missaat EU-mit ukiumut isertittalissagai qulakkeerneqarpoq, tassa siornagornit allannguuteqarpallaarani.

Suluppaakkanik EU-mut pisassiissutit isumaqatigiissummi annikillisinneqarujussuarput. Imminnguanut(tattattuunut, tupissutinut) pisassiissutit piivinneqarput, qaleralittassat ikilisinneqarput EU-llu saattuartassai affaannanngortinneqarlutik.

Aalisarnermut isumaqatigiissummi aningaasat Kalaallit Nunaata iluanaarutigisartagai koruunit 319 millioniniit 132 millioninut ikilipput. Suleqatigiinnissamilli isumaqatigiissut nutaaq, isumaqataigiissut Qajaq, tamatumunnga ataqatigiissittariaqarpoq, isumaqatigiissummi tassani qulakkeerneqarmat ineriartortitsinermut tunngatillugu Kalaallit Nunaat koruuninik 186 millionit missaannik ukiumut taperneqartassasoq.

Aalisarneq pillugu isumaqatigiinniarnermi, Ilulissani marlunngormat aallartittumi, Nunanut EU-mut ilaasortanit qulingiluanit aallartitat peqataapput.

Isumaqatigiinniarnerit naammassiartorneranni ajornakusoortitsisunut ilaapput, europamiut umiarsuaasa Kalaallit Nunaata imartaani aalisartut akiliutigisartaligassaata nutaap assortuussutaangaatsiarnera. Aalisarneq pillugu 2003-mi isumaqatigiinniarnerni taanna saqqummiunneqaraluarpoq, atorneqarsimananili. Kisianni tassa aappaagumiit atuutilissaaq.

Isumaqatigiissut ukiuni tulliuttuni arfinilinni atuutissaaq, pisassiissutit akillu ukiut tamaasa naligiissaarneqartarsinnaassallutik.