Aalisarneq pillugu inatsit inaarneqanngitsoq tusarniaassutigaat
Takuinnarlugu tukappasipput. Inatsisissatut siunnersuut juunip 18-ianni nassiunneqarpoq, akissuteqarnissamut aggustip 20-at tikillugu periarfissaqarluni.
Kisianni inatsisissatut siunnersuut suli naammassineqanngilaq: Aalisarneq pillugu ataatsimiititaliarsuup ukiuni marlunni sulereerluni inassuteqaatini februaarimi 2009-mi tunniuppai, taakkua inatsisissatut siunnersuummi ilaanngillat.
Taamaammat suleqatigiitsitat sisamat, ataatsimiititaliarsuup inassuteqaataanut naapertuuttunik ilanngussaqarnissaq siunertaralugu maanna ulapileruttorput.
Suleqatigiissitat inassutaat aamma tusarniaaffigineqartunit isummerfigissallugit periarfissaqarfiginiarneqartussapput.
Tusarniaanermi akissuteqarnissaq qaangiuppat, inatsisissatut siunnersuut ukiakkut ataatsimiinnermi taasissutigineqarnissaa siunertaralugu Inatsisartunut saqqummiunneqssaaq.
Kalaallit Nunaanni Sulisitsisut Peqatigiiffiat, GA, tusarniaaffigineqartunut ilaavoq. Tassani pisortap Henrik Lethip pissutsit atorluarniarsarivai:
Inatsisissatut siunnersuut suliarilluangaanerusimasariaqaraluarpoq. Aamma imarisai pakatsissutigaagut. Siunnersuutilli allanngortinnissaa siunertaralugu Naalakersuisoqarfimmi oqaloqatiginnilissaagut, taamaalilluni inatsisissatut siunnersuut, Inatsisartut isummerfigisassaat, inuussutisarsiortunut aammalumi inuiaqatigiinnut tamanut iluarinartuuniassammat, Henrik Leth oqarpoq.
Suleqatigiitsitat ataatsit pisassiissutinik nuussisinaaneq sammivaat. Tassalu pisassiissutinik piginnittup pisassaminik ukioq ataaseq pisarinngisaminik ukiup tullianut nuussisisinnaanissaanut tunngasut.
Suleqatigiitsitat tulliisa pisassiissutit niuerutigineqarsinnaasut nammineq pigisat sammivaat. Tassa aalisartut pisassaminik aalisartumut allamut tuniniaasinnaaneranut tunngasut.
Suleqatigiitsitat pingajuisa sinerissamut qanittumi aalisartut avataasiorlutillu aalisartut immikkoortinneqarunaarnissaat misissorpaat.
Suleqatigiitsitallu sisamaasa aalisarnerup aqunneqarnera allaffissornikkut qanoq pisariillisarneqassanersoq misissorpaat.
Suleqatigiitsitat sisamat sulinerat sapaatit akunerisa marlussuit ingerlaneranni naammassissangatinneqarpoq.
Aalisarneq pillugu nutaamik inatsiseqalernissaa Inatsisartunut ilaasortat pingasut 2003-mili kissaatigaat. Inatsisissarlumi Inatsisartuni siullermeerlugu 2007-mi suliarineqarpoq.
