Aalisarneq pillugu inatsisissami aporfiit misissorneqarput

Pisanik tulaassisussaatitaaneq, kinguariit tulliisa taarsiunnissaat pisassallu ukiuni arlalinni atuuttut. Aalisarneq pillugu inatsisissami apeqqutit aporaarssutaasinnaasut tamarmik suleqatigiisitani suliarineqarput, tusarniaaffigineqartullu tamarmik suleqatigiissitani ilaapput.
Allattoq Jens Thorin
juulip 14-at 2010 15:48

Aalisarneq pillugu inatsisissatut siunnersuut suli naammassineqanngitsoq tusarniaassutigineqarpoq, apeqqutit isumaqatigiinngissutigineqartut suleqatigiisitani naapeqatigiinniutigineqarmata.

Aalisarneq pillugu Ataatsimiititaliarsuup inassutini februaarimi 2009-mi tunniuppai. Inassutit taamanili aalisartut kattuffiinik avissaartuutsitsipput.

Ilaatigut tulaassisussaatitaanermut, qanoq pisassaqartigisinnaanermut aammalu ukiunut arlalinnut pisassiisarnissamut tunngasut isumaqatigiinngissutigineqarlutik.

Isumaqatigiinngissutit tamakkua naapeqatigiissutiginissaat siunertaralugu ataatsimiititaliarsuup siunnersuutigaa, suleqatigiisitanik pilersitsisoqassasoq. Taamaammat Kalaallit Nunaanni Sulisitsisut Peqatigiiffiat, KNAPK NUSUKA-lu Namminersorlutik Oqartussaneersut peqatigalugit suleqatigiisitani maanna suleqataapput.

Suleqatigiisitalli Naalakkersuisoqatigiinnit Siumumit Atassummillu aallartinneqarsimanngitsut, aalisarnermut naalakkersuisoq Ane Hansen oqaluttuarpoq:

- Naalakkersuisunngornitta kingorna paasisimavarput, suliat Aalisarneq pillugu Ataatsimiititaliarsuup tunniussinerata kingorna ingerlanneqarsimanngitsut, suleqatigiisitallu piaartumik aallartittariaqarnikuuakka, inatsisissap suliarinerani nalilersuutit assigiinngitsut pisariaqartikkakkit. Taamaattumik massakkut ataatsikkoortillugit ingerlappavut, tusarniaajutigaluta qulaajagassat kingulliit qulaajartillugit, Ane Hansen oqarpoq.

Tamatuma kinguneraa, tusarniaaneq marloqiusamik ingerlammat: Tusarniaaffigineqartut inatsisissatut siunnersuummut oqaasissatik nassiutissavaat, aappaatigullu aamma aalisartut kattuffii aaqqiagiinngissutitik suleqatigiisitani naapeqatigiissutigissallugit.

Pisat ilaannik nunami tunisassiorfinnut tulaasisussaatitaaneq inatsisissatut siunnersuummi ilaavoq, tassalu suleqatigiisitani suliarineqarani.

Siunnersuummi allassimavoq, Naalakkersuisut malittarisassanik aalajangersaasinnaasut, aalisartut tunisassiorfinnut nunamiittunut tunisisarnissaannik.

Taava aalisartut tulaassisarnisaannik Naalakkersuisut pisussaaffilerniarnersut imaluunniit taamaaliorniannginnersut nalunarpoq.

Aalisarneq pillugu Ataatsimiititaliarsuup inassutaasa saniatigut suleqatigiisitat aamma misissorpaat, avataasiorlutik aalisartuni kinguaariit tullinnguuttut taarsiunnissaat qanoq ilillutik piareersarneqartassanersoq.Tamanna sammineqassasoq Sulisitsisut Peqatigiiffiata Polar Seafoodillu kissaatigaat.

Suleqatigiisitat apriilip naalernerani sulilerput, suliaminnillu aggustip 17-ani tunniussisussaallutik.