Aalisarneq pillugu inatsisiliornermi innuttaasut tusaaneqarnerussapput
Tassunga tunngatillugu Aalisarnermut naalakkersuisoq Ane Hansen (IA) ima oqarpoq.
- Ingammik sinerissap qanittuani avataasiorlunilu aalisartut akornanni aaqqiagiinngittoqarmat, qulaajanissaq pisariaqarpoq. Taamaammat KNAPK aamma Sulisitsisut Peqatigiiffiat isumaqatigiissuteqarfigaakka, inatsisissap tamakkiisumik saqqummiunneqarnissaa siunertaralugu suleqatigiissasugut, taassumalu aqqutaani oqaloqatigiittassasugut aammalu peqatigiilluta innuttaasunik paasissutisseeqatigiinnerit ingerlatissagivut.
Tassalu Ane Hansen siuttoralugu februaari naalerpat aalisartoqarfiit annerit tikeraarneqassapput, aalisarneq pillugu inatsissami aalisartunit suut pingaartinneqarnerpaanersut tusarniarlugu.
Ane Hansenili aamma allanngugassanik tikkuagassaqareerpoq. Assersuutigalugu kinguaariit tulliisa aalisarnermut peqataanissamut periarfissakinnerat inatsisissatut siunnersuummi siullermi annerusutut sammineqarsimanngitsoq, Ane Hansen oqarpoq.
- Raajarniarneq eqqarsaatigiganni, raajartassat tamaavimmik inuttaqarput, inuusuttullu taamaammat iserniarnissaminnut ajornartorsiuteqartarparput. Inuusuttut kilisaatersulerusuttut pitsaanerusumik periarfissaqalernissaat siunertaralugu, raajartassiissutit ilaannik procentinik aalajangersimasunik illuartitaqalernissaq siunertatsinnut ilaavoq, Ane Hansen oqarpoq.
Kisianni piujuartitsinissamik isuma aalisarnermi inatsisissami suli pingaarnerpaasoq, Ane Hansen neriorsuivoq.
- Taanna aalajangiusimavara. Peqassuseq apeqqutaajuartuartariaqarpoq, piniutit tunisassiorfiillu suut ingerlanissaannut.
Aalisarneq pillugu inatsisissatut Naalakkersuisut siuliisa siunnersuutaat, qinersisoqarneratigut atorunnaarpoq, tassalu inatsisissatut siunnersuut, maanna suliarineqartoq, Inatsisartut ukiaru siullermeerlugu suliarissavaat.
