Aalisarneq pillugu EU-mut isumaqatigiissut nunatsinnut iluaqutaasimava?

Aalisarnermut Pisortaqarfimmi atorfillit nalunaarusiassartik maanna ataatsimiissutigeqqammerpaat.

Nalunaarusiarineqartussami qulakkeerniarneqassaaq Aalisarneq pillugu EU-mut isumaqatigiissut ilumut nunatsinnut iluaqutaasimanersoq. Taannalu nalunaarusiaq EU-p nalunaarusiaritittagaanut POSEIDON-rapportimut sanillersuunneqassaaq.

Qaammatit marluk matuma siorna Radioaviisikkut Poseidon-rapporti pillugu tusarliussivugut. Tassani ilaatigut eqqartorneqarpoq, Kalaallit Nunaata Aalisarneq pillugu EU-mut isumaqatigiissutaa imminut akilersinnaalluartoq. Tassanimi allassimavoq EU 50 procentit sinnerlugit iluanaaruteqartartoq.

Aalisarnermilli Pisortaqarfiup tamanna ilumut eqqortuunersoq qulakkeernikuunngilaa. Aalisarnermulli Pisortaqarfiup nalunaarusiaa suli suliarineqarpoq saqqummiunneqannginneranilu aalisarnikkut attuumassuteqartut aamma tusarniaavigineqaqqaartussaapput.

Nalunaarusiaq taanna Londonimi EU-mi pingajussaaneerlugu isumaqatiginninniutigineqarnerani atorneqartussaagaluarpoq, naluneqanngitsutulli nunatsinni qinersinissaq aporfiusussanngorpoq.