Naalakkersuisut: Aalisarneq pillugu ataatsimiititaliarsuaq akuerineqarpoq

Aalisarneq pillugu Ataatsimiititaliarsuup sulinermini pingaarutilippassuit qulaajartussaavai, taamatuttaaq 
ataatsimiititaliarsuarmi eqqartuussissuserisoq, Jens Paulsen siulittaasutut toqqarneqarpoq. 

Aalisarnermut inatsisissaq nutaaq pillugu ataatsimiiititaliarsuaq siunnersuusiussaaq, inatsimmi maannamut atuuttoq 1996-imeersuuvoq, 13-eriarlugulu allanngortinneqarsimalluni.  

- Neriuppunga Aalisarneq pillugu Ataatsimiititaliarsuarmi ilaasortat suliaminnut tunniusimallutillu tapersersuillutik suleqataajumaartut, inatsit allaqqunneqarsinnaanngitsumik siunissami ukiorparujussuarni atuuttussaammat, Aalisarnermut, Piniarnermut Nunalerinermullu Naalakkersuisoq, Nikkulaat Jeremiassen oqarpoq.

Ataatsimiititaliarsuup sulinissaa
Aalisarneq pillugu ataatsimiititaliarsuaq 2020-imi juunip naaneranut suliaqartussaasoq siunertaavoq - Naalakkersuisullu aalisarnermut inatsisissatut siunnersuummik 2020-imi ukiaanerani inatsisartuni ataatsimiittoqarnerani saqqummiussinissaat naatsorsuutaavoq.

Ataatsimiititaliarsuup sulinermini ilaatigut suliniutaasinnaasut misissorlugillu nalilersussagai, Naalakkersuisut nittartagaani saqqummiunneqarput:

• Pisuussutinik atuinermut sinaakkutinik aqutsineq
• Piginnittuunermi pisassiissutillu pillugit pissutsit kiisalu aningaasaliissuteqartitsisinnaaneq
• Unammilleqatigiinnissamik qulakkeerinninneq aalisarnermilu piginnittuunermik annertunerusumik siammaasinnaaneq
• Aalisakkanik pisuussutinik atuinermi annertunerusumik naleqalersitsineruneq
• Siunnersuutit ataatsimiititaliarsuarmit suliarineqartut aningaasatigut allaffissornikkullu kingunissaat