Aalisarneq oqaatsillu qinersissutigineqarput
Partii inuit oqaatsinik pingaartitsiniarnerat qinersisartunit tiguaasimalluni.
-Kalaallit kulturiannik oqaatsinillu pingaartitsisut qinerpakka, qinersisartut ilaat Kirsten Sandgreen oqarpoq
-Kalaallisut oqaatsivut taakkua pingaarnerpaarpaatut, kulturerput aamma taanna ajunngilaq kisianni kalaallisut oqaatsit salliutinneqartariaqarput. Tassa partii nutaaq Partii Inuit taamatut oqariartuuteqartuuvoq, isumaqarpa taava taanna qinersimagit? Tassa taamaalluinnarpoq, Kirsten Sandgreen kalaallit oqaasiinik pingaartitsilluni taasisoq taama oqarpoq, kisimiinngilarlu partii inuit qineqqusaartitaanut toqqaasoq.
-Siulliullugit atorneqarnissai suliffeqarfinni Kalaallit Nunaanut tikittunullu, Nuno Rosbach kalaallit oqaasiisa pingaarnertut atorneqalernissaanik pingaartitsisoq qinersereernermi kingorna taama oqarpoq. Aammali aalisarnermi atukkat tunngavigalugit qinersisoqarpoq, tassa pisasseeriaaseq aalisartumit iluarineqanngilaq.
-Massakkullu killilersugaanermik, tamakkua tamarmik killiligaagamik aamma inuluarneq pilerami, soorlu pisassat suli pisarineqanngittut ilaasa pigilereertutut pisaleramikkit, taanna inooriaasitsinnut Kalaallit Nunaannut tulluutinnginnami, Niels Poulsen qinersereernermini taama oqarpoq, ukiunilu kingullerni sisamani aalisarnikkut politikkerineqartoq allanngortariaqarsoraa, taannalu kisimiinngilaq.
-Ilinniartitaaneq taavalu aalisarneq, ilaquttakka aalisartooriarmata, Jensigne Lindenhannip oqarpoq, tassa aalisagartassat ikippallaarsorai ilinniartitaanermilu kalaallit oqaasii atornagit misilitsittarnerup allanngortinneqarnissaanik oqariartuut qinersinermini aalajangiisuunerarpai. Vera Larsen partii Siumut qinerpaa, tassani ilinniartitaanermik siuarsaarusunneq pingaartissimavaa. Aatsitassarsiulernissaq tvikkut qineqqusaarnermi sammineqangaatsiaraluartoq, tamanna qinersinerminut aalajangiisuusorinngilaa.
- Iluamik taakku pulaffiginngilakka, ilinniarnermut tunngasut kisiisa malinnaaffiginerugakkit, Vera Larsen oqarpoq.
Qinersisartut partiinik ukiuni kingullerni sisamani naalakkersuisuutitaqartunik taakkualu suliniutaanut isumaqataasullutik taasisimasut immiutsikkusussimanngitsut naapissimallugit aamma erseqqissaatigissavara.
