Aalisarneq inuussutissarsiutinik siuarsaanermut atorneqassaaq
Pingaartumik nunatta avannaani aalisarneq inuiaqatigiinnut nutaanik isertitaqarfiulernissaa Jens Erik Kirkegaardip naatsorsuutigaa. Sumiiffimmi tassani aalisarneq suli annerusumik iluanaarutaasariaqarpoq. Imartami Tysklanditut angitigisumi pisuussutit maannamut qaqinneqarsimasunit amerlanerujussuit pigineqarput, tamannalu siunissami iliuuseqarfiginiarneqarpoq.
-Nunatta sineriaa 44.000 km-inik isorartussuseqarpoq, taamaammat aalisagartassiissutitta Islandimit amerlanerunnginneri ilumoorsinnaanngilaq. Aalisagaativut suunersut misissortariaqarparput, tamannalu suliassatta pingaarnerit ilagissavaat. Aalisakkat amerlanerusut aalisakkerivinni suliffinnik amerlanerusunik pilersitsinermik kinguneqassapput, aammalumi inuussutissarsiornerup iluani tamarmi. Akileraarutitigut isertitat amerlanerulissapput inuillu pisisinnaassuseqarnerulissallutik. Imaassinnaavoq nammineq illussaminnik sanasut, tamakkulumi aamma suliffinnik pilersitsissapput, Jens Erik Kirkegaard knr.gl-imut oqarpoq.
Atlantikup avannaata issittortaani puisit ullromut aalisakkanik 45.000 tonsinik nerisarput, uumasoqatigiillu taakku amerliartortinnaveersaarsinnaasuugaanni aalisakkat pisariaqarsinnaasut amerlissagaluarput puisillu neqaanik amiinillu tunisanit isertitat amerlanerullutik. Suliffissaaleqisorpassuarnut suliassaqartitsissagaluarput, pingaartumi sinerissami inuiaqatigii ukiuni makkunani ajornartorsiutigisaannut iluaqutaallutik.
-Suliffissaqanngitsorpassuit ilinniagaqanngitsuupput, aalisarnermillu inuussutissarsiuteqarnerput misissorluarutsigu taakku suliffissaqartissinnaavagut. Sulisummi amerlippata pisortanillu ikiorsiissutinik pisartagallit ikilippata tamanna nunatta ingerlanneqarneranut aningaasassaqarnerulernermik kinguneqassaaq. Nassaassarsiullaqqinnerusariaqarpugut, piiaaviillu aatsitassallu allat piujuaannartitsinissaq tunngavigalugu isumatusaartumillu ingerlanneqalissappata inuiaqatigiit ataatsimut isigalugit iluanaarutigissavaat, Jens Erik Kirkegaard isumaqarpoq.
