Aalisarneq aatsitassallu Norap qitiutippai
Norap - tassa Nunat Atlantikup Avannaamiuisa Suleqatigiiffiata - aatsitassarsiornermi aalisarnermilu suliffissuaqarnerup kingunerisaanik allanngortitsinerit, ukiuni makkunani immikkut sammivai. Kalaallit Nunaanni, Islandimi, Savalimmiuni Norgillu Kitaani sukkasuumik ineriartornerup inuiaqatigiinnguit sinerissamiittut sunnertarpai.
Tamanna ineriartorneq nutaaq pillugu Norgemi Molde-mi juunip aqqarnganni aqqaneq aappaannilu isummersoqatigiittoqassaaq.
Isummersoqatigiinnermi qulequtarineqarpoq "Eqqarsaatiniit iliuuseqarnissamut - atlantikup avannaamiuinut allannguutit", NORA'p ukiut pingasut ingerlaneranni iluarsartuullugu pilersaarusiarisimasaa, suliffissuqarnermik suliallit Kalaallit Nunaanniit, Norge-miit Islandimiillu assigiissutaasinnaasut assigiinngissutaasinnaasullu misissuiffigisimavaat.
Suliniut pinngorsimavoq Maniitsup eqqaani aluminiumik aatsitsiviliornissamik pilersaarut aallaavigalugu. Pilersaaruterujussuaq inuiaqatigiinnguanik allanngortitserujussuartussaq. Allantikup avannaamiuinut sunniutissaa pillugu Alcoap pilersaarusiaa aallaavigalugu misissueqqissaartoqarsimavoq.
Paasisat misilittakkallu misissueqqissaarnermi pissarsiarineqartut isummersoqartigiinnermi saqqummiunneqassapput. Pilersaarutaavoq paasisat, ilisimasat sakkussaasinnaasullu Allantikup Avannaamiuinut unammillernartunut qanoq aaqqiivigineqarsinnaanersut saqqummiussorneqarnissaat.
- Suliniutitsinnut misilittakkavut pillugit nunarsuarmioqativut oqaluttuunniarpagut, suliffissuaqarnermillu suliallit ataatsimoortillugit misilittagaat ilisimasaallu saqqummiussortillugit, suliniummik aqutsisoq Laust Løgstrup Qeqqata Kommunianeersoq oqarpoq.
