Aalisarlutik unioqqutitsisartut akiorneqassapput
Nunat avannarliit aalisarnermut naalakkersuisui, ukiumoortumik ataatsimeersuarnerat Norgemi ingerlanneqaqqammerpoq.
Aalisarnermut Naalakkersuisoq Finn Karlsen oqarpoq oqallinnernut ilaasoq unioqqutitsilluni aalisartarnerup iliuuseqarfigineqarnissaa.
- Nunat assigiinngitsut akuersissuteqaratik aalisartarnerat akiorniarneqarnissaat tamanit isumaqatigiissutigineqarpoq, timitalimmillu angusaqarniarnissaq isumaqatigiissutigineqarpoq. Aappagu ataatsimiinnissaq nunatsinni nanginneqassaaq. Unioqqutitsillutik aalisartartut akiorniarnerini nunat tamat anguniarsarisassaanut ilaavoq, aalisarnissamut akuersissuteqanngitsut orsussamik tunisiviginaveersaartalernissaat aammalu pisiffiginaveersaarneqartalernissaat, aamma nakkutigeqqissaarneqartalernissaat anguniarneqarpoq. Unioqqutitsisumik aalisartartut tassaapput nunarsuarmi aalisakkat akiinik appasinnerulersitsisartut, aamma peqassutsimut piujuaannartitsinissamut tamakkua ajoqutaapput. Nakkutilliisut amerlisinneqarsinnaaneri aamma eqqartorneqartussanut ilaajumaarput, Finn Karlsen naggasiivoq.
