Aalisariutitoqqat taarsersorniarpaat

Aalisarneq pillugu inatsit allanngortinneqarpat ukiuni kingullerni marlunni isertitat ikinnerpaamik affaasa aalisarnermit isertitaasimanissaat piumasaqaataajunnaassaaq. Tamanna saqqummerpoq aalisarnermut inatsisip allannguutissaatut siunnersuut marlunngornermi ullaap tungaa saqqummiunneqarmat.

Naalakkersuisut sinerissap qanittuani aalisarneq imminut akilersinnaanerusoq anguniarpaat, taamaammat sinerissami qanittumi aalisarnermi pisassiissutit qummut killingisa 10 procentimit 15 procentinngortinneqarnissaat siunnersuutigaat.

Aalisarnermut Naalakkersuisup Ane Hansenip oqaatigaa aalisarnerup ingerlaasianik allannguissanngikkunik aalisarnerup tungaatigut siunissami ajalusoortoqassasoq.

Ane Hansenip aalisariutit sinerissap qanittuaniittut nutaanngippallaalersimaneri nutarternissaannullu aningaasarpassuarnik atuisariaqalerneq oqariartuutigaa.

Aningaasat 600 - 700 million koruunit akornanni aalisariutinut 32-iusunut atorneqarsinnaaneri naatsorsuutigineqarpoq.

Aalisariutit aserfallatsaalineqarnissaat aalisarnermut naalakkersuisup Kalaallit Nunaata aningaasanik tiguinnarissanik peqaranilu akiliisinnaanngimmat suliffeqarfiit namminersortut, inuit ataasiakkaat, utoqqalinersiaqartitsivik SISA allallu akileeqataasinnaanerat periarfissaanerarpaa.

Inatsisartut upernaakkut ataatsimiinnerat naammassippat aalisarnermut inatsisip nutarterneqarnerata ingerlateqqinnissaa Ane Hansenip piareersimaffigaa.

Ilaatigut raajarniarnermi kinguaariit nikinnissaannut ajornartorsiuteqarneq aamma pisuussutinik atuinermut ernianut tunngasut nutarsaavigissallugit.

Aalisarnermut inatsik upernaakkut inatsisartut ataatsimiinneranni eqqartorneqassaaq, 2012-imi atuutsinneqalernissaa pilersaarutaalluni.