Aalisariutit ulorianaqaat
Iliuusissat, Nunatsinni aalisariutinut tunngatillugu suliniutissanut ilaasut, Imarsiornermi Ajutoortoqarsimatillugu misissuiartortartut februaarimi ajunaarnerup misissuinermut atatillugu nalunaartutiminni tamanna ilisimatitsissutigaat. Aalisartoq 31-nik ukiulik kilisaammi Erika-mi Islandip kangiani ilaatilluni nakkarnermi kingorna ajunaartoq uani pineqarpoq.
Tassalu Imarsiornermut aqutsisoqarfiup Namminersorlutik Oqartussat, Sulisitsisut Peqatigiiffiat GA, Danmarkimilu aalisarnermi sullivinnut avatangiisit pillugit siunnersuisoqatigiit suleqatigalugit, iliusissanik maanna pilersaarusiortoq, ajunaarneq pillugu nalunaarusiami atuarneqarsinaavoq. Suliaq taanna siorna ajunaarnerup allap misissorneqarnera naammassimmat aallartinneqarpoq. Tassa aalisartoq inuusuttoq kilisaammi Markusimi ilaatilluni qalorsuarnit nassataritilluni ajunaarmat.
Naallu suliaq suli naammassineqanngikkaluartoq, iliuusissatut pilersaarusiap qulequtai annerit pingasut suussanersut ersarittut, Imarsiornermi Ajutoortoqarsimatillugu misissuiartortartut ilisimatitsipput. Tassalu Nunatta Danmarkillu akornanni ilisimasanik avitseqatigiittarnissaq, isumannaallisaarneq pillugu aalisariutinut umiarsualivinnit annerni imarsiornermillu ilinniarfinni paasissutissiisarnerup pitsanngorsarnissaa, taavalu aalisariutini sullivinni avatangiisit eqqumaffigineqarnerulernissaat.
Aamma inassutinut ilaavoq attaveqatigiinnik pilersitsisoqassasoq, isumannaallisaanermi sinniisut umiarsualivimmiit umiarsualivimmut angalasassallutik.
Taamaasiornikkut sulinerup nalaani ajutoornerit sorliit akulikinnerunersut akisussaasunit malinnaavigineqarluarnissaat siunertaavoq aammalu umiarsuarni ajutoornerit ilinniarfigineqarnissaat pinngitsoortinneqarnissaallu isumannaarneqarniassammata.
Kilisaammi Markusimi siorna ajunaartoqarnerata kingorna kisilisaat politiinut suliassanngortinneqarpoq kilisaammi isumannaallisaanerup amigarnera suliakkiutaalluni. Suliaq tamanna ukioq manna aallartilaartoq naammassineqarmat kilisaat 40.000 koruuninik akiligassinneqarpoq.
Maanna suliaq kilisaammi Markusimi pisumut assiguvoq, Imarsiornermilu Qullersaqarfiup maanna eqqarsaatigilerpaa, suliaq taanna politiinut suliassanngortinneqassanersoq. Suliarlu taannarpiaq tuaviuussaasoq, Imarsiornermi Qullersaqarfiup inatsisilerituuata, Finn Tikjøbip radioaviisimut oqaatigaa.
- Toqumik kinguneqartumik ajutoornerit asuliinnaanngitsutut isigaagut taakkulu piaartumik suliarineqarnissaat pingaartillutigu, inatsisileritooq oqarpoq. Finn Tikjøbip maanna suliarileruttorpaa arlaannaannut attuumassuteqanngitsumik misissuisimasut nalunaarutaa.
