Aalisariutit qulit Nuummi umiarsualivimmik assersuipput
Aalisariutit qulit umiarsualivimmik assersuipput. Umiarsuavlimmik assersuineq inatsisinik unioqqutitsineruvoq. Umiarsuaq ilaasunik angallassissut Arctic Umiaq Line angallataa, Sarfaq Ittuk ippassaq Nuutoqqap saavanut umiarsualivissilluni laasut assartortariaqariaqarsimavai. Umiarsualivimmik assersuineq ingerlaannassaappat Royal Arctic Linep umarsuaa imarpikkoortaat aqagu tikittussaq eqqorneqarsinnaavoq.
Takornarianut angallassissut Kisaq assersuineq soqutinagu ullaarmmanna umiarsualivimmut pulavoq, aalisartullu umiarsualivimmik assersuisut Kisaq politiinut nalunaarutigaat, taakku oqarlutik Kisaq assersuineq akimorlugu umiarsualivimmut ingerlaarnermini inuit arfineq pingasut inuunerat ulorianartorsiortissimagaat. Arnaq aalisartut angallataanniittoq pituutaq kittorarmat nissumigut eqqorneqarpoq, Nuummi aalisartut oqaaseqartartuat Malaaraq Bourup Nielsen oqarpoq. Nuummi Politiit aalisariutinut assersuisunut ikillutik assersuinermi peqataasut atii allattorpaat. Malaaraq Bourup Nielsen oqarnera malillugu saarulliit akii 75 øremik qaffanniarlugit Royal Greenland neqerooruteqarsimavoq, tamannali aalisakkat tunineqartarnerisa minnerpaaffilerneqarnissaanut aalisartut piumasaqarnerannut naammanngitsoq Malaaraq Bourup Nielsen oqarpoq.
Saarulliit tunineqartarnerisa akiisa 75 øremik qaffanneqarnissaannik Royal Greenlandip neqorooruteqarsimanera pillugu KNAPKip siulittaasua Leif Fontaine oqaaseqartinniarsimagaluarparput tamannali pillugu oqaaseqarniarani nalunaarpoq. KNAPKip siulittaasua Leif Fontaine Aalisarnermut naalakkersuisumut Ane Hansenimut ammasumik allagaqarluni erseqqisarpaa, Kalaallit Nunaanni aalisartut piniartullu inuussutissarsiornikkut inuuniarnikkullu ajorluinnartup killinganiimmata inuiaqatigiinnit katataajartuinnavillutik. Akinik minnerpaaffiliinikkut tunisassiorfiit ilorraap tungaanut aallariarnissaat alloriarfiussagaluarmat siunissamik upperinninnilernermik aallarneeqataasussaq. Taannami massakkorluinnaq pisariaqartinneqarpoq, KNAPKip siulittaasua Leif Fontain tusagassiuutinut naluaaruteqarluni taamatut allaappoq.Aalisakkat tunineqartarnerisa akiissa minnerpaaffilerneqarnissaannut piumasaqaat, aalisarnermut naalakkersuisumit Ane Hansenimit itigartitssutigineqarpoq, aalisartulli oqaloqaitiginissaanut piareersimalluni.
