Aalisariutileqatigiiffimmi piginneqataasut eqqartuussivilersuunneqarput
Inuit aalisariutileqatigiiffimmi North Greenland Seafoodimeersut pingasut aalisariutileqatigiiffiup allap aningaasaataanik atornerluisimasutut unnerluutigineqartut, Ilulissani kredsretip uppernarsarpaa.
Allattoq Louise M. Kleemann
aggustip 13-at 2008 10:40
Qeqertaq Fish A/S-imi siulersuisut siulittaasuat, Erik Nielsen, Qeqertaq Fishimik aamma piginneqataasoq, oqarpoq inuit pingasut maanna Qeqertaq Fishimiikkunnaarnikut eqqartuussisulersuunneqartut. Aningaasallu pineqartut maanna utertinniarneqarput.
Eqqartuussisulersuunneqartut Qeqertaq Fish A/S-imiikkunnaarlutik maanna North Greenland Seafoodimiipput.
North Greenland Seafood nammineq aalisariutaateqanngikkalurluni naalakkersuisunit immikkut akuerineqarluni 1000 tonsinik saarullittassinneqarpoq.
North Greenland Seafood saarullittassanik 2000 tonsinik qinnuteqaraluarpoq, affaannaalli pissarsiaralugit.
Eqqartuussisulersuussineq qaqugu aalajangiiffigineqassanersoq nalunaarutigineqanngilaq.
