Aalisariutaateqanngitsut saarullittassinneqarput
Piginneqatigiiffiit nutaat marluk pisassinneqarput, Aviisi sermitsiaq ippassaq saqqummersoq taamatut allaaserisaqarpoq.
Piginneqatigiiffiit pineqartut aalisarsinaanermik akuersissummik tunineqarsimanngikkaluartut saarullitassinneqarput.
Piginneqatigiiffik saarullittassinneqartup aappaa Tasiilami angerlarsimaffeqartutut allassimavoq, ateqarluni Tunumi Tsuuddii. Piginneqatigiiffimmi tassani piginneqataavoq Tasiilami Borgmesteri Vittus Mikaelsen, piginneqatigiiffillu taanna suli aalisariummik pisisimanngilaq.
Nunatsinni aalisarnermik ingerlataqartut annersaat, Namminersornerullutik Oqartussanit piginneqataaffigineqartoq Royal Greenland 1.000 tonsinik saarullittasinneqarpoq.
Taamatut saarullittassanik agguaasisimaneq naammaginau Namminersornerullutik Oqartussat nalunaarfigivagut, agguaasseriaaserlugu atorneqartoq paasisinnaanatigu, Royal Greenland-ip pisortaata tullia Paaviaraaq Heilmann sermitsiamut oqarpoq.
Royal Greenland nunami suliffissanik pilersitsinissaanik Namminersornerullutik Oqartussanit isumalluarfigineqarpoq, illuatungaatigullu suliffeqarfissuaq Royal Greenland isertissinnaasaanik qulakkeernagu, tamanna naammaginanngilaq Paviaaraq Heilmann aviisimi sermitsiami apersorneqarluni oqarpoq.
