Aalisariut umiusimasoq suliareqqitassanngortinneqartoq

Aalisartuusimasup aalisariutini Nuup avannaani Maalutumi umiusimasoq qimaannarsimammagu 100.000-ilikkaanik akiliisitaasussanngussutigaa. Unnerluutigineqartuup Svend Åge Larsenip taama eqqartuunneqarnini suliareqqitassanngortippaa.

Umiarsuaq qeqertami Maalutumi, Nuummiit avannamut 5 sømilit missaannik ungasitsigisumi tippussaasimavoq, uppikarsimallunilu.

Allagaq unnerluussut naapertorlugu taama pisoqarnera immamut, sikumut, nunamut qaqqamullu mingutsitsisinnaavoq. Svend Åge Larsen, Nunamut Namminermut naalakkersuisoqarfimmit, pinngortitamut avatangiisinullu naalakkersuisoqarfimmit tamanna pillugu peqquneqarsimavoq umiarsuaq peeqqullugu.

Svend Åge Larsenili akerliuvoq:

- Suliaq naleqqutinngitsuliorneruvoq, sivisuallaarlunilu. Unnerluussisussaatitaasup suliaq uannut tutsinniarsaraa, Svend Åge Larsen KNR-imut oqarpoq.

Suliaq 2012-imi aallartippoq, umiarsuup peerneqarnissaanut Svend Åge Larsen taamanikkut peqquneqarami. Taamaalinngilarli, 800.000 koruuninillu 2014-imi januaarimi akiliisussanngortinneqarluni. Akiliisussanngortitaavoq, aalajangiinermulli isumaqataanngikkuni suliaq eqqartuussivitsigut suliareqqitassanngortissinnaanngorlugu.

AAMMA ATUARUK Nutaamik inatsisiliornerup imartarput illersussavaa

Umiarsuup peerneqarnissaanut akiliisitaasussanngortinneqarnini Svend Åge Larsenip naleqqutinngissoraa, taassumami oqarnera naapertorlugu umiarsuup aserorteriffineqarnera pissutaalluni umiummat.

- Umiarsuaq eqqakkatut tassunga qimaannanngilara. Nuup Akiani ukiuni pingasuni ajornaquteqanngitsumik kisaqqavoq, Svend Åge Larsen oqarpoq.

Umiarsuaq aserorteriffigineqarnermi kingorna ajornartorsiutaalerpoq, kisaa ilaatigut serlersaarfigineqarsimammat. Umiarsuaq kingorna taava tissukalerpoq nunamullu tippussaanermi kingorna uppikarluni, Larsen oqarpoq.

Suliaq kingorna taava aalajangiivigineqaqqimmat, Svend Åge Larsen 400.000 koruuninik siorna 2017-imi juulip ulluisa 31-anni akiliisitaasussanngortinneqarpoq.

Kia umiarsuaq piissaneraa suli nalornissutigineqartoq, Kommuneqarfik Sermersuup oqaatigaa. Suliaq Nunatta Eqqartuussisuuneqarfiani maajip ulluisa 29-anni suliareqqitassanngortinneqarpoq.

AAMMA ATUARUK Kalaallit Nunaata imartaa illersorneqassaaq

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat