Aalisakkerivinnik matusigallarnerit eqqarsaatigilluagaapput
Nuussuarmi Upernavik Kujallermilu aalisakkerivinnik matusigallarnissamik aalajangiisoqarsimanera eqqarsaatigilluarneqarsimavoq. Ukiuunerani qaleralinnik tunisisoqarnissaanut naammattumik qerititsivissaqannginnera matusigallartariaqarnermut pissutaavoq.
Allattoq Peter Troelsen, Simon Uldum
januaarip 22-at 2014 06:43
Upernavik Seafoodip aalisakkerivinnik ukiut siuliini ukiukkut ammatitsisarnerani umiarsuup siulliup tikinnissaata tungaanut apriilip qaammataanit matusigallartoqartariaqarsimavoq. Qerititsiviit ulikkaartarnerinik tamanna peqquteqarsimavoq.
-Periaaseq taanna ingerlatsivimmut akilersinnaasimanngilaq. Taamaammat ukiormanna allatut iliorniarluta aalajangerpugut, marsillu aallaqqaataanit ukiup sinnerani pisiortorsinnaanissarput naatsorsuutigalutigu, Upernavik Seafood A/S-imi pisortaq Flemming Andersen oqarpoq.
Maanna siunissamilu pitsaanerpaamik aaqqiissuteqarnissaq anguniarlugu ingerlatsiviup kommunimik oqaloqateqarsimanera aamma oqaatigaa
