Aalisakkeriviit sulisussaaleqisarnerat naammaleqaaq
Pissutsit taamaattut akuerineqarsinnaanngillat, - taama aalisartut ilaat Nuummeersoq Malaaraq Bourup Nielsen Nuummi aalisakkerivimmi sulisussaaleqisarneq ukiut tamaasa ajornartorsiusaasartoq pillugu sulisinnaasunillu nunanit allaneersunik tikisitsisalernissamik Paaviaaraq Heilmann oqaaseqaatigisimasaanut tapersiuteqarluni allappoq.
-Aalisagarpassuit nalliuteruttorput, uagullu aalisartut sapinngisannguarput tamaat aningaasarsiorniarluta ilungersorpugut, aalisakkat tammakarpata aningaasarsiorniarneq annikillisussaammat, Malaaraq Bourup- Nilsen Nuummi aalisakkanik suliffissuup sulisussanik amigaateqartuarnera ukiut tamaasa ajornartorsiutaasartoq ilungersunartutut tikkuarlugu allakkamini oqarpoq, nangillunilu:
- Maani Nuummi suliffissuaq sulisunik amigaateqarneq pissutigalugu killilersuilluni aallarteruttorpoq, ullut sisamat tunitsiviusinnaasutut taamaallaat periarfissapput, - tamanna uagutsinnut kipiluttunartorujussuuvoq, Malaaraq Bourup-Nielsen radioaviisimut allakkamini oqarpoq.
- Ippassaq tunisassiorfimmiit aalisagatsiarsuit asiusoortut eqqaannaraat takullugit ilungersuummernarpoq, tunitsivigisattalu ajunaarutigisussanngoraat takullugu nuannerpallaanngilaq. Uagut aalisartut ilungersorluta qaqitagut sulisussaqannginneq pissutaalluni eqqaannarneqartariaqanngikkaluarput, tamannami pissutaalluni aalisakkerivik matuneqarataannaavoq.
Aalisaganeruttorfiani sulisussanik amigaateqarneq pissutaalluni nunanit allaneersunik tikisitsisalernissaq Paaviaaraq Heilmannip oqaaseqataa isumaqatiginartorujussuuvoq. Aaligooq nunarput namminiilivinniartoq. Pissutsit taamaattut akuerineqarsinnaanngillat. Nunatta namminiilivinnissaa isinniit isigalugu ungaseqaaq, ila ungaseqaaq, aaligooq nunarput aalisakkanik nappateqartussaaniaraluaq, Malaaraq Bourup-Nielsen ilungersuummersimaqisoq allakkamini taama oqarpoq.
Naggataatigut aamma oqaatigaa imigassamik ikiaroornartumillu ajornartorsiutit qaangertinnagit pissutsillu taamaatsillugu nunatta namminiilivinnissaa qanittukkut pinavianngitsoq.
