Aalisakkerisut pikkorissartalissapput
Qaasuitsup kommuniani aalisarnermi pisassat nugunneqarnerini suliffissaaleqisartut, aatsitassarsiornikkut uuliasiornikkullu inuussutissarsiutaalersussanut pikkorissarneqartalernissaanut Naalakkersuisut aamma Qaasuitsup kommmunia isumaqatigiissuteqarput, pikkorissaanernut aningaasat 1,5 millioni koruunit atorneqassasut atsioqatigiissutigineqarlutik.
-Innuttaasut taakkununnga ikaarsaarusuttut pikkorissarneqarnissaat isumaqatigiissummi uani eqqarsaatigineqarput, Inuussutissarsiornermut aatsitassarsiornermullu Naalakkersuisoq Ove Karl Berthelsen oqarpoq.
Inuussutissarsiornermut Naalakkersuisoq Ove Karl Berthelsen aamma Qaasuitsup kommuniani borgmesteri Jess Svane suliffissaaleqinerup akiorneqarnissaa akiorniarlugu isumaqatigiissutertik ullumi atsioqatigiissutigaat.
Taamaasillutik Naalakkersuisut Qaasuitsup kommuniani ukiaanerani 2012-mi PKU-mi pikkorissaanissanut aningaasat 1,5 millionit koruuninik immikkoortitsinissaminnut pisussaaffilerput.
-Aatsitassarsiorneq, uuliasiorneq aamma suliffissuaqarferujussuarnik pilersitsinissamik suliniuteqarnitsinni, innuttaasut taakkununnga ikaarsaarusuttut pikkorissarneqarnissaat uani isumaqatigiissummi aamma eqqarsaatigineqarput, Naalakkersuisunut ilaasortaq Ove Karl Berthelsen oqarpoq.
Ove Karl Berthelsenilu nassuiaavoq Qaasuitsup kommuniani aalisarnikkut pisassat nugunneqarnerini suliffissaaleqisartut pikkorissarneqarsinnaanerannut neqerooruteqarnissaminnut piareersimasuuteqarusullutik, tamannalu Qaasuitsup kommuniani borgmesterimit Jess Svanemit isumaqatigineqartoq.
-Unittoqarnerani tamatigut pikkorissaanerit, aammalu immaqa inuttut assigiinngitutigut siunissamut ungasinnerusumut sakkussaqartitsilernissamik aqqutissiuusseqatigiilluta ingerlatsinissaq uani siunertarinerpaavarput, borgmester Jess Svane oqarpoq.
Aatsitassarsiorusuttut inatsisinik tunngaviusunik aamma piumasaqaatinik naammassinnittut arlaqartut 2012-mi qinnuteqaateqarnissaat, inuussutissarsiornermut aatsitassarsiornermullu Naalakkersuisup Ove Karl Berthelsenip neriuutigaa, taakkunanilu sulilernissaminnut pikkorissarneqarsinnaajumaartussat amerlassusii suli inissinneqanngikkaluartut, aatsitassarsiornikkut uuliasiornermilu sulisinnaasussat ukiut tallimat qaangiuppata pisariaqartinneqassasut oqaatigalugu
-Taamaattumik taakku, piffissaq taanna ukiunik sisamanik tallimanik sivisussusilik annertuumik pikkorissaanikkut, pisinnaasunik nutaanik pikkorissaaqqinnikkut matussuserneqarniarnissaa piareersarfigalugu taamatut isumaqatigiissuteqarpugut, Naalakkersuisunut ilaasortaq Ove Karl Berthelsen oqarpoq.
