Aasianni aalisakkerivimmi sulisartut meerartai juulleriartornerani nuannersumik misigisaqartinneqartussanngorput.
Royal Greenland Accademy-p Air Greenland-illu suleqatigiinnerisigut decembarip pingajuani sisamaanilu meeqqat sermersuaq qulaallugu akeqanngitsumik Dash 7-imik timmisartuunneqartussanngorput.
Royal Greenland Academy-mi sallaallernermik pikkorissartut juullilernerani puussianik juullerpaluttunik kaaginik imalinnik timmisartunut ilaasartussanut sassaalliutissanik sanassapput. Tassa puussiaaqqat 12.000-it missaanniittut sanaartorneqassallutik, decembarillu aallaqqaataanit puussiaaqqat kaaginik imallit timmisartuni ilaasut pisinnaalissavaat.
Suleqatigiinnissaq Royal Greenland Academy-p ingerlatsisuanit Roger Larsen-imit Air Greenland-imilu sulisoqarnermut pisortamit Svend Hardenberg-imit isumaqatigiissutigineqarsimavoq.