Aalisakkerineq ilinniarfiillu Qaqortumi suliffissaqartitsissapput

Sulisoqarnermut Pisortaqarfiup Qaqortup Kommunia suleqatigalugu suliffissaasinnaasunik periarfissarsiuinera neriulluarnartoqartoq, Suliffeqarnermut Naalakkersuisoq Johan Lund Olsen oqarpoq. Neriuutiginerarpaalu Qaqortumi kommunalbestyrelsi nutaaq suleqatigalugu suliffissanik periarfissarsiuineq iluatsissinnaasasoq. Ukioq kingulleq aallarnerfigalugu misissuinerit aallartinneqarsimapput, aasaq mannalu nalunaarusiaq naammassineqarsimalluni.

- Aalisakkerineq eqqarsaatigalugu siornatigut Nuka A/S-iusimasoq Arctic Green Food aamma Polar Seafood suleqatigalugit aalisakkerineq Qaqortumi aallarteqqinniarneqarpoq, tamannalu neriulluarnartoqartoq oqaatigisinnaavara, Naalakkersuisunut ilaasortaq Johan Lund Olsen oqarpoq. Aamma Naalakkersuisut ilinniartitaaneq pillugu siunissamut pilersaarutaat eqqarsaatigalugu Qaqortumut iluaqutaassasoq oqaatigineqarpoq.

- Ilinniartitaaneq piginnaangorsaaqqinnerlu eqqarsaatigalugit Naalakkersuisut pilersaaruteqarput, tamakkulu aamma Qaqortumut sunniuteqartussaassallutik. Tamaammat suna tamarmi taartuinnartut oqaatigineqarsinnaanngilaq, Johan Lund Olsen oqarpoq.

Ammeriviup mersortarfianut tapiissutigineqartartut 2,9 mio koruuninik aningaasartallit peerniarneqarneri Qaqortup borgmesterianit illoqarfimmilu Atassutip immikkoortortaqarfianit sakkortuumik Naalakkersuisunut naammagittaalliutigineqarput, tassani suliffiit 20-it missaat annaaneqartussaassammata.