Aalisakkat tamarmik akiitsuuserneqarnissaat qularineqartoq
Avaleraasartuunut, qaleralinnut raajanullu aalisarnerup iluani suliffiit maannakkut akitsuuteqartarput, aaqqissuusseqqinnerulli kingorna aalisakkat tamarmik akitsuuteqalissallutik.
Tamannali Inatsisartuni partiit ilaasa nuannarinngilaat.
- Aalisakkat tamarmik akitsuuserneqarnissaat isumaqarpunga, inatsisartuni partiillu akornanni eqqartorneqaqqaartariaqartoq. Saarulliit soorlu qiviarutsigit taakku takkullutillu qimagoqqittarput. Taamaattoq akiitsuutit mianersortumik eqqartugassaapput, Siumut sinnerlugu Inatsisartuni ilaasortaq, inatsisartullu aningaasaqarnermut akileraartarnermullu ataatsimiititaliaani siulittaasoq, Jens Immanuelsen oqarpoq.
Akitsuutit aqqutigalugit aningaasanut inatsisissamut siunnersuut ukiup tulliani 15 millionit koruuninik isertitsiffiussasoq Naalakkersuisut aningaasanut atortussanut naatsorsuinerminni ilannguppaat, taassumalu saniatigut 2017-imi iserteriikkat qaavatigut 50 millionit koruuninik isertitaqaqqinnissartik naatsorsuutigalugu.
Suliarli tuaviuunneqarpallaartoq, politikerit arlaqartut isumaqarput.
Jens Immanuelsenip Siumut oqaaseqartartuatut oqalugiaatimini allappaa, aalisakkanut akitsuutit partiinit oqallisigineqarluaqqaartinnagit aningaasanut inatsisissami siunnersuummiissanngikkaluartut.
Inuit Ataqatigiinnit isumaqataapput
- Inuussutissarsiutip qanoq nammataqarsinnaatigineranik, qanorlu sukkatigisumik akiitsuutit eqqunneqarnissaannut misissueqqaaratik aningaasat isertinneqartussat qassiunersut soorlumi aalajangeereersimagaat, Inuit Ataqatigiit sinnerlugu inatsisartuni ilaasortaq, inatsisartullu aningaasanut akileraartarnermullu ataatsimiitsitaliaani aamma ilaasortaasoq, Naaja Nathanielsen oqarpoq nangillunilu.
- Uagut suliamut tunngasunik ilisimasallip innersuussutai utaqqeqqaarlugit aalisakkat sorliit akitsuuserneqassasut, qanorlu akitsuut annertutigisinnaanera Siumutulli ujartorparput, Naaja Nathanielsen oqarpoq.
Taamaakkaluartoq Siumut Inuit Ataqatigiillu aningaasat akitsuutikkut isertinneqarsinnaasut allat unitsikkusuppasinngilaat.
- Uani pisuussutit inuiaqatigiinnut, aamma naleqarnerusunngortitsiniaanermi, inuiaqatigiinnut pissarsissutaanissaat oqariartuutigivara, Jens Immanuelsen oqarpoq.
