Aalisakkat qaleruallillu uumatillugit umiarsuakkut assartorneqarsinnaalerput

Containerit immikkut ittumik suliat suliffeqarfimmit Aqualife-mit Maersk Line suleqatigalugu aamma uumassusilinnit pisunik atortussianik Novozymesimeersunik ineriartortinneqarsimapput.

Containeri ataaseq imermik 1.500 liiterimik qalerualinnillu 600 kiilut angullugit imaqarsinnaavoq. Aamma imeq gradinik arlaqanngitsuinnarnik kissassuseqartussaammat, qaleruallit toquusaqqasassapput, taamaalillutillu sapaatip akunneri pingasut sinnerlugit umiarsuarmiissinnaallutik.

Atuagassiap ingeniørip nittartagaani ullumi taama allaaserinnittoqarpoq.

Qaleruallit Manerassuakkut imaluunniit Atlantikukkut sapaatip akunnerini marlunni angallanneqarsinnaapput, Aqualifemiilli qaleruallit aamma aalisakkat malussarinnerusut sivisunerusumik angallanneqarsinnaanissaat kissaatigineqarpoq.

- Teknikkikkut periarfissat atorlugit pinngortitap nammineq pissusaa containerini pilersissinnaavarput, Christian Munch Novozymesimeersoq oqarpoq.

- Taamaalilluta teknikkikkut periarfissat atorlugit aalisakkat uumatillugit containerinik assartorsinnaanngussavavut, Christian Munch ingeniørimut oqarpoq.

Aqualifep 2010-mi aasap kinguninnguagut teknikki nutaap atorsinnaalernissaa naatsorsuutigaa. Taamatut assartuisinnaalernikkut uumasut atugarissaarnerulernissaat pitsaanerusumillu tunisassiorsinnaalernissaq anguneqassasoq Christian Munchip ilanngullugu oqaatigaa.